Jobanyń maqsaty - veb-baǵdarlamalaý salasynda IT mamandaryn daıarlaý.
«Bul joba aımaqtaǵy IT mamandarynyń kadrlyq rezervin qurýǵa, atap aıtqanda, veb-baǵdarlamalaý salasynda jumys isteýge múmkindik beredi. Jobany iske asyrý jumyspen qamtý, IT-qoǵamdastyǵyn men tehnologııalyq kásipkerlikti damytý jáne qoldanystaǵy mamandardyń biliktiligin arttyrý máselelerin sheshedi. Atalmysh joba halyqtyń áleýmettik turǵydan osal toptaryn da qamtıdy jáne birqatar áleýmettik máselelerdi sheshedi dep senimmen aıtýǵa bolady. Eń bastysy, joba Atameken balalar aýylynyń tárbıelenýshileri úshin áleýmettený máselesin, sondaı-aq, turmysy tómen jáne margınal jastar arasynda masyldyq kózqarasty boldyrmaý máselesin sheshedi», - dep atap ótti Qyzylorda oblysynyń sıfrlyq tehnologııalar basqarasynyń bólim meńgerýshisi Iýlııa Tremasova.
Bul jobanyń basym baǵyty retinde paıdalanýshy ınterfeısin qurýda «frontend» tańdaldy. Mamandardyń atalmysh sanaty - jumysqa ornalasý máselesinde suranysqa ıe. Sondaı-aq, joba sheńberinde tehnologııalyq kásipkerlikke, startaptardy uıymdastyrýǵa jáne bıznes-quraldarǵa erekshe kóńil bólinedi.
Uıymdastyrýshylardyń aıtýynsha, kýrs baǵdarlamasy Qazaqstannyń IT-jumys berýshileri usynatyn naqty jobalarmen jumys isteýge tolyq daıyn bolatyndaı etip jasalǵan.
Joba uıymdastyrýshylardyń málimetine saı, qatysýshylar birneshe baǵytta sabaq alyp úlgerdi: HTML-qujat qurylymy, bazalyq uǵymdar, teorııalar, stıldeýdiń bazalyq múmkindikterin zerttedi, formalarmen jumys isteýdi úırendi, bazalyq ólshem birlikterin jáne pozısııalaý mehanıkasyn zerdeledi, selektorlardyń ne ekenin jáne olarmen qalaı jumys isteý kerektigin bildi, CSS-nyń keıbir ozyq múmkindikterimen tanysty. Odan ári olar oıyndar men mobıldi qosymshalardy ázirleý, óziniń Telegram-botty qurý, VR/AR tehnologııalary, qurylymyn ázirleý týraly jáne startap úshin sýper komandany qalaı qurý kerektigi jaıly bilim aldy.
Kezdesýlerge Mail.ru, Tinkoff, Bugart Games, Iаndeks , Chocofamily, Doctor.kz, Kazdream.kz, Kompra, sııaqty tanymal kompanııalardyń ókilderi qatysty.
Osy jobany iske asyrý barysynda árbir sarapshy, baıandamashy, ınvestor men bıznes ıesi mentor rólindegi tyńdaýshyny anyqtaıdy. Sondaı-aq, uıymda praktıkadan ótkizý jáne odan ári jumysqa ornalastyrý múmkindigin ózine qaldyrady.
Atalmysh joba boıynsha jumys 6 aıdy (2019 jyldyń naýryz – qyrkúıek aralyǵyn) qamtıdy. Onyń ishinde onlaın oqytý, saýalnama júrgizý jáne qatysýshylardy irikteý, semınar, vorkshop, kezdesý men bıznes-model oıyndary ótkiziledi. Jobaǵa 14-35 jas aralyǵyndaǵy áleýmettik az qamtylǵan otbasy músheleri, stýdentter, oqýshylar men ózin-ózi jumyspen qamtyǵan 200 qatysýshy 437 ótinim berýshiniń arasynan iriktelip alyndy. Oqytý aqysyz negizde júrgiziledi.
Joba Qyzylorda oblysynyń sıfrlyq tehnologııalar basqarmasy janyndaǵy «Aqparattyq tehnologııalar ortalyǵy» KMM-niń uıymdastyrýymen ótip jatyr.