– Osy bes áleýmettik bastama ómirge joldama alǵaly partııanyń oblystyq fılıaly qoǵamdyq keńestiń alty otyrysyn ótkizdi. Endi turǵyn úı baǵdarlamasynyń atqarylý barysy jaıly áńgime bolatyn májilisti qurylys alańynda ótkizýdi jón kórdik, – dedi Nur Otan partııasy oblystyq fılıaly tóraǵasynyń birinshi orynbasary Jańabaı Bısembaev.
Qostanaı oblysynda «7-20-25» turǵyn úı baǵdarlamasy boıynsha turǵyndardan 453 ótinish berilgen. Onyń ishinde 2 mıllıard 347 mıllıon teńge turatyn 306 ótinish maquldanǵan. Bul kórsetkishter boıynsha Qostanaı oblysy elimizde 7-shi orynda tur. Byltyr turǵyndarǵa atalǵan baǵdarlama boıynsha ıpotekany tek bir bank berse, bıyl bul iske ekinshi deńgeıli taǵy alty bank qosylyp otyr. Jyl aıaǵyna deıin jekemenshik qurylys kompanııalary salǵan úılerden taǵy da 368 páter «7-20-25» baǵdarlamasy boıynsha satylý úshin osy bankterge beriledi. Sonda jyl aıaǵyna deıin Elbasynyń áleýmettik bastamasy boıynsha 600 qostanaılyq qonys toıyn toılaıtyn bolady.
О́tken jyly oblysta baǵdarlama boıynsha 343 páter ıesin tabady dep josparlanǵan edi. Biraq bul júzege asqan joq. Oǵan qurylysshylar da, jergilikti atqarý organdary da kináli emes, baspanaly bolǵysy kelgen turǵyndardyń qaryzdy óteý áleýetiniń álsizdigi sebep bolǵan edi.
– Turǵyndar bankterge ótinish bergenimen, ózderiniń nesıe tólemine áleýeti jetetinin dáleldeı almaıdy, anyǵyn aıtqanda, qarjysy az bolady. Olar osy baǵdarlamany jasaýshynyń biri retinde bizden «taǵy da jeńildik bola ma?» degen suraqtar qoıady. Oǵan jaýap berýge mursat joq, osy baǵdarlamanyń ózi úlken jeńildik ekenin aıtamyz, – deıdi Ulttyq banktiń oblystyq fılıaly Qarjylyq baqylaýdy uıymdastyrý jáne qarjy qyzmetin kórsetýde tutynýshylar quqyn qorǵaý bóliminiń bastyǵy Áset Qýanyshbaev. Baǵdarlamany júzege asyrýǵa ekinshi deńgeıli bankterdiń qosylýyna oraı, satylatyn páterler sany da kóbeıtildi. Qostanaı qalasynda boı kótergen jańa «Iýbıleınyı» shaǵyn turǵyn aýdanynda jyl aıaǵyna deıin úsh kópqabatty turǵyn úı paıdalanýǵa beriledi. Oblystaǵy belgili qurylys kompanııasynyń ókili Mıhaıl Fedıashınniń aıtýynsha, atalǵan memlekettik turǵyn úı baǵdarlamasy áleýetti satyp alýshylar qataryn kóbeıtken. Iаǵnı, turǵyndar ǵana emes, bıznes salasy da utyp otyr.
Oblysta «7-20-25» baǵdarlamasyna qatysqan bankter arasynda «Sentrkredıt banktiń» oblystaǵy fılıaly aldyńǵy orynda keledi. Bank turǵyndardan 195 ótinish qabyldap, onyń 169 ótinishin maquldaǵan. Al Ulttyq bank aqparatyna qaraǵanda, elimizde «7-20-25» baǵdarlamasyn júzege asyrý aıasynda turǵyndardan 12000 ótinish qabyldanyp, onyń ishinde 83 mıllıard teńgeni quraıtyn 7 myńnan astamy maquldanǵan.
QOSTANAI