Festıval maqsaty ózgerissiz. Bul – ulttyq horeografııalyq ónerdi qoldaý jáne tanymal etý, pedagog-horeograftardyń kásibı qaýymdastyǵyn nyǵaıtý, horeografııalyq bilim berý salasynda shyǵarmashylyq jetistikter men tájirıbe almasý.
Festıval Elbasy N. Nazarbaevtyń jarııalaǵan «Rýhanı jańǵyrý» qoǵamdyq sanany jańǵyrtý memlekettik baǵdarlamasyn júzege asyrý jáne Jastar jyly aıasynda ótýde. Osyǵan baılanysty uıymdastyrýshylar qazirgi jastardyń mádenı tárbıesi men shyǵarmashylyq áleýetin damytýǵa erekshe kóńil bóledi.
Festıval stýdentter men oqytýshylardyń, konsertmeısterler men ádiskerlerdiń, ǵalymdar men balet ártisteriniń basyn qosty. Atap aıtsaq, keń aýqymdy halyqaralyq sharaǵa Qazaqstan, Reseı, Bashqurstan, Qyrǵyzstan, О́zbekstan, Býrıatııa, Iаkýtııa jáne Ońtústik Koreıa horeografııalyq oqý oryndarynyń kásibı bı ujymdary men stýdenttik ujymdary qatysýda.
Halyqaralyq óner merekesiniń ashylý saltanatynda Darıa Dmıtrıeva (Iаkýtııa), Lıýdmıla Mergeneva (Býrıatııa), Gaınıkamal Beısenova (Qazaqstan) shyǵarmashylyq jastardyń talantyn damytýǵa baǵyttalǵan aýqymdy bilim berý baǵdarlamasy týraly, búgingi zamanaýı balet óneriniń baǵyt-baǵdary týraly qysqasha sóz sóıledi. Balet sheberleri tájirıbesimen bólisip, jeke sheberlik synyptary aıasynda óz elderi men óńirlerindegi balet mektepterin tanystyrdy.
Balet mektepteriniń V festıvaliniń baǵdarlamasy is-sharalarǵa asa baı boldy. Festıval qonaqtary úsh kún boıy túrli taqyryptar men janrlardaǵy sharalardy tamashalap, balet týraly tanymyn keńeıtti. Atap aıtqanda, «Vremıon svıazýıýshaıa nıt» atty taqyryptaǵy qazaq sahnalyq kıiminiń ekspozısııasy, G. Qapanovanyń «Bıge jol» fotoekspozısııasy, jas avtor Natalı-Ramınty Baraýskaıteniń «Bı boıaýlary» atty kórkem kórmesi, «Jahandaný dáýirindegi zamanaýı óner jáne bilim» konferensııasy, «Mekteptiń tusaýkeseri jáne horeografııalyq bilim berýdiń damý bolashaǵy – XXI ǵasyr baleti» atty dóńgelek ústel, «A.Seleznev atyndaǵy Almaty horeografııalyq ýchılıshesiniń búgini» atty fılminiń tusaýkeseri bolyp ótti.
«О́rleý» V Halyqaralyq balet mektepteriniń festıvali búgin, 18:30-da Abaı atyndaǵy Qazaq memlekettik akademııalyq opera jáne balet teatrynyń sahnasynda ótetin gala-konsertpen aıaqtalady.
Buǵan qosa, úsh kúnge sozylǵan festıvaldiń Ulttyq IýNESKO Klýbtary Federasııasy, «PetroQazaqstan», «Balet pen ulttyq bıdi damytý jáne qoldaý» qory, sondaı-aq Abaı atyndaǵy MAOBT-yń qoldaýymen ótkenin de aıta ketkenimiz lázim.