Qazaqstan Respýblıkasynyń Prezıdenti Qasym-Jomart Toqaev Qyzylorda oblysyndaǵy turǵyndarmen kezdesý barysynda óńirdegi ekologııalyq problemalarǵa, sonyń ishinde, Aral problemasyna, aınalasyna zııanyn tıgizip otyrǵan munaı-gaz jáne ýran qaldyqtaryna nazar aýdardy.
– Ekologııa – qyzylordalyqtardy tolǵandyratyn máseleniń biri. Halyq Aral taǵdyryna alańdaıdy. Elbasynyń bastamasy boıynsha «Syrdarııa arnasyn retteý jáne Aral teńiziniń soltústik bóligin saqtap qalý» jobasy iske asyrylýda. Osy jobanyń jáne Kókaral bógetiniń arqasynda Kishi Araldaǵy sý qalpyna keldi. Bul balyq sharýashylyǵyn jandandyrýǵa septigin tıgizdi. Taǵy bir mańyzdy másele – búginde turǵyndardy munaı-gaz ben ýrannyń zııandy qaldyqtary alańdatyp otyr. О́ńirdegi kásiporyndarǵa jańa tehnologııalar engizip, ekologııalyq qaýipsizdikti halyqaralyq standarttarǵa saı etý qajet, – dedi ol.