Ashylý saltanatynda QR Premer-Mınıstriniń orynbasary, QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraıymy Gúlshara Ábdiqalyqova sóz sóıledi. Vıse-Premer óz sózinde Elbasy N. Nazarbaevtyń alǵa qoıǵan strategııalyq maqsattary – 2050 jylǵa qaraı damyǵan 30 eldiń birine aınalýǵa qol jetkizý sheńberinde Qazaqstanda Úshinshi jańǵyrý, «Sıfrlyq Qazaqstan» baǵdarlamasynyń iske asyrylyp, Indýstrııa 4.0 elementteriniń engizilip jatqanyn atap ótti. Olar jahandyq táýekelder: ekonomıkalyq osaldyqtar; geosaıası shıelenister; qoǵamdyq, saıası jáne tehnologııalyq turaqsyzdyq; qorshaǵan álem problemalary aıasynda júrgiziledi. Bul jumysta áıelder qaýymdastyǵy basty draıverlerdiń biri bolyp qalyptasýda.
«Biz dástúrli otbasylyq qundylyqtardy nyǵaıtýǵa jáne otbasy ınstıtýtyn qoldaýǵa basym nazar aýdaramyz. Áıelderdi jáne balalary bar otbasylardy áleýmettik qoldaýdyń tutas júıesi quryldy. Sońǵy 10 jylda bıýdjet shyǵyndary osy maqsattarǵa 5 eseden astam ulǵaıdy», — dedi G. Ábdiqalyqova.
Forým aıasynda QR ulttyq ekonomıka vıse-mınıstri M. Júnisbekova, «Atameken» UKP basqarma tóraǵasynyń orynbasary L. Ramazanova jáne «Ekomed» adam urpaǵyn órbitý klınıkasynyń basshysy S. Baıqoshqarova baıandama jasaǵan bes paneldik sessııa ótti: «ShYU-ǵa qatysýshy elderdiń óńirlik yntymaqtastyǵynyń genderlik aspektileri», «Áıelderdiń aımaqtyń turaqty jáne ınklıýzıvti ekonomıkalyq damýyna qatysýy», «Densaýlyq saqtaý men bilim berýge ınvestısııalar: óńirlik yntymaqtastyq úshin múmkindikter», «Múmkindikter teńdigi maqsatyndaǵy ınnovasııalar men sıfrlandyrý dáýiri», «Áıelder men qyzdardyń jaǵdaıyn jaqsartýǵa arnalǵan óńirlik syn-qaterler men múmkindikter».
Forým qorytyndysy boıynsha Qarar qabyldaý josparlanýda.