Sondaı-aq saılaýǵa baıqaý júrgizý jónindegi ulttyq qoǵamdyq platformasy aıasynda táýelsiz baıqaýshylarǵa arnalǵan dáris uıymdastyryldy. Jıyn barysynda qoǵamdyq uıymnyń baǵyty, maqsattary men mindetteri túsindirildi. «Prezıdent saılaýy táýelsiz elimizdiń tarıhyndaǵy asa bir mańyzdy oqıǵa. Oǵan respýblıkanyń iri qalalarynan bastap, shaǵyn aýyldaryna deıin tegis belsendilik tanytý kerek. Sebebi saılaý degen bul – zaıyrly memlekettiń tarıhynda, ómirinde eń bir mańyzdy kezeńderdiń biri. Sondyqtan sizder ózderińizdiń konstıtýsııalyq quqyqtaryńyzdy paıdalanyp, durys tańdaý jasap, prezıdenttik saılaýǵa atsalysýlaryńyz kerek», dedi Azamattyq platformanyń jetekshisi Musaǵalı Dýambekov.
Atalǵan jıynda saılaýshylardy tolǵandyryp júrgen birqatar suraqqa sala mamandary qysqasha túsinik berip ótti. «Kóbine turǵyndar daýys berý barysy qandaı ekendigin, basqa aımaqta issaparda júrip qalaı daýys berýge bolatyndyǵyn, saılaýshylar tiziminen ózin qalaı tekseretinin bile bermeıdi. Bul azamattyq alań osy suraqtarǵa jaýap berip, saılaýshylardyń saıası belsendiligin arttyrýǵa kómektesedi», deıdi «Amanat» saılaýdy baıqaý jónindegi azamattyq platformasynyń jaýapty mamandary.
Saılaý týraly quqyqtyq talaptarǵa sáıkes aqparat berý, saılaýshylar men baıqaýshylardyń mindetterin quqyqtyq negizde túsindirý, jergilikti saılaý komıssııasymen ózara birlesken is-qımyldar jasaýǵa úıretýdi kózdegen trenıng barysynda qatysýshylar ózderine qajetti málimetpen qanyqty ári OSK, kandıdattyń saılaý shtab-páteri jáne ózge de saılaýǵa qatysty aımaqtarda zań buzý faktileri tirkelse, onda birden qandaı áreketter jasaý kerektigi týraly keńester aldy.
ShYMKENT