Tórt kúnniń qorytyndysy boıynsha rallı jalpy esepte burynǵydaı avtoshabandoz Naser Ál-Attııa kósh bastap keledi, katarlyq tórt kezeńniń ekeýinde top jardy. Ál-Attııa men Mate Bomel ekıpajynyń jalpy esepte Iаkýb Pshıgonskıden 9 mınýt, al Bernhard Ten Brınkeden 10 mınýt basymdyǵy bar. Ázirge ekinshi oryn úshin osy nıderlandtyq jáne polshalyq avtojarysshylar arasynda ótkir básekelestik oryn alýda. Tórtinshi orynǵa erli-zaıypty Stefan men Andrea Peteranselderdiń dýeti ornalasqan.
Jarystyń tórtinshi kúni taǵy da Kendirliden bastaldy. Bul kezeńde shabandozdar aldymen kúrdeli navıgasııasy bar qumdy ýchaskelerdi júrip ótip, jyldam dala joldaryna shyqty. 58 kılometrde olardy tasty tóbemen tómen baǵyttalatyn jol kútip turdy. 120 kılometrden keıin rallıster jyldam tegis joldardy eńserip, máre syzyǵynyń aldynda keń greıderge shyqty.
Tórtinshi arnaıy ýchaskede eń úzdik ýaqytty Saýd Arabııasynyń avtoshabandozy Ál-Radjı tirkep, qashyqtyqty 3 saǵat 45 mınýt jáne 53 sekýndta júrip ótti. О́tken jylǵy qazaqstandyq kezeńniń jeńimpazy keshegi apatty jaǵdaı jáne kóp ýaqyt joǵaltýyna qaramastan, jarystyń sońynan deıin kúresýdi sheshti.
Alaıda, Iаzıd ál-Radjı men Dırk fon Sısevıstiń komandasy «Rallı Qazaqstan 2019» jarysynda jeńiske jetýdiń múmkindigin joǵaltyp aldy, sebebi ekıpaj úshinshi kezeńniń máre syzyǵyn keser aldynda sporttyq reglamentti buzǵany úshin 4 saǵattyq penalızasııa aldy.
-Keshegi oqıǵadan keıin bizde barlyǵy durystaldy. Kólik dóńgelegi din-aman jáne eshqandaı qıynshylyqqa tap bolmadyq. Biz altynshy bolyp jarysty bastadyq, aldymen Zapletaldy ozdyq, sodan keıin máre syzyǵyna deıin Peteranseldiń artynan júrip otyrdyq, dedi Ál-Radjı.
Búgingi jeńiske qaramastan, Ál-Radjı jarys kóshbasshysynan jalpy esepte 5 saǵatqa artta tur.
«Dakar» rallı-marafonynyń 13 dúrkin jeńimpazy fransýz avtoshabandozy Stefan Peteransel búgin máre syzyǵyna ekinshi bolyp keldi. Bul - Qazaqstandaǵy álem Kýbogy kezeńindegi erli-zaıypty Stefan men Andrea Peteransel dýetiniń úzdik nátıjesi. «Rallı Qazaqstan» debıýtanttary Mańǵystaý shól joldarynyń ereksheligine birtindep boı úıretip keledi.
-Búgin biz jarysty tórtinshi kezekte bastadyq. Aldymen Pshıgonskıdi qýyp jettik. Qazir ol jáne Ten Brınke aldyńǵy oryndarǵa talasýda. Al bizden jeńistiń aýyly alystap ketti, sondyqtan men ony basyp ozýǵa tyryspaımyn jáne kedergi jasamaýǵa tyrysamyn. Jalpy, búgin sátti kezeń boldy, dedi Stefan Peteransel.
О́ziniń Mini John Cooper Works Rally avtokóligimen Iаkýb Pshıgonskı jáne onyń shtýrmany Tımo Gottshalkpen máre syzyǵyn úshinshi bolyp kesti. Polsha eliniń avtoshabandozy arnaıy ýchaskeni jyldam ári senimdi júrip ótip, nátıjesinde Bernhard Ten Brınkeden bir jarym mınýtqa erte keldi.
-Úshinshi pozısııadan jolǵa shyqtyq. Jolda kóp shalshyq sýlar kezikti. Biz barymyzdy saldyq. Jospar tek Brınkeni basyp ozý bolatyn, ol bizdiń qolymyzdan keldi. О́tken jylmen salystyrǵanda sózsiz biz jyldam júrýdemiz. Eń mańyzdysy - aqtyq nátıje, dedi Iаkýb Pshıgonskı.
Vladımır Vasılevtiń jarystan shyǵyp qalýy men Iаzıd Ál-Radjıdiń kóp saǵattyq penalızasııasy Mıroslav Zapletal men Denıs Krotovtyń besinshi orynǵa talasýyna jol ashty. Ázirge tórt kezeńniń qorytyndysy boıynsha chehııalyq shabandoz reseılik sportshydan jalpy esepte bes mınýtqa alda keledi.
Qazaqstandyq Andreı Cherednıkov pen Ignat Falkovtyń ekıpajy jarystyń barlyq kezeńderinde birqalypty nátıje kórsetip keledi. Komanda búgin 4 saǵat 48 mınýt pen 4 sekýndta qashyqtyqty eńserip, segizinshi bolyp márege jetti. Tórt kúnniń qorytyndysy boıynsha "OFF ROAD Kazakhstan" komandasynyń ókilderi jalpy esepte jetinshi orynǵa jaıǵasty.
T2 jol talǵamaıtyn kólikter sanatynda qazaqstandyq Kırıll Chernenkov pen Alekseı Mýnnyń ekıpajy qashyqtyqty 6 saǵat 12 mınýt 30 sekýndta júrip ótti. Degenmen, bul sanatta jalpy esepte katarlyq Mohhamed Ál-Meerdiń ekıpajy kósh bastap tur.
T3 sanatynda Fedor Vorobevtiń ekıpajy eń jyldam ýaqytty kórsetti, olar 5 saǵat 5 mınýt jáne 32 sekýnd nátıjesimen márege birinshi jetti.
Júk kólikteri serııasynda tórtinshi kezeńde reseılik «Kamaz-master» komandasynyń ókili Dmıtrıı Sotnıkov taǵy da jeńis toıyn toılady. Ekıpajdyń kórsetkishi 5 saǵat 39 mınýt 29 sekýnd.
Rallı-reıdtiń besinshi kúninde avtoshabandozdar Aqtaý qalasynyń soltústigindegi aınalma jolǵa bet alyp, 290 shaqyrymdy júrip ótedi.
«Rallı Qazaqstan 2019» rallı-reıdinen Álem Kýbogynyń kezeńi Mańǵystaý oblysynyń aýmaǵynda ótýde jáne ol 1 maýsymda aıaqtalady.
Mańǵystaý oblysy