Halyq zııalylary jerlengen memorıaldy keshende ótken sharada taǵzym gúli qoıyldy. QMDB-nyń oblystaǵy ókili, ortalyq «Aqmeshit-Syrdarııa» meshitiniń bas ımamy Bolatbek qajy Ulasqanuly zulmat qurbandarynyń rýhyna quran baǵyshtady. Jınalǵandar Alash ardaqtylaryn bir mınýt únsizdikpen eske aldy. Mıtıngte oblys ákimi Qyrymbek Kósherbaev sóz sóıledi.
– Búgin – qazaq eli úshin, qazaqstandyqtar úshin qasiretti de azaly kún. Altaıdan Atyraýǵa deıingi atyrapty alyp jatqan keń baıtaq jerdiń ıesi bolǵan halqymyzdyń basynan qanshama qasiretti jyldar ótse de, dál osyndaı aýyr da azaptysy bolmaǵan shyǵar. 1992 jyly osy máseleni arnaıy zerttegen Qazaqstan Respýblıkasynyń Joǵarǵy keńesi Tóralqasynyń komıssııasy «qazaq eli ashtyqtan jáne soǵan baılanysty indetterden, sondaı-aq, tabıǵı ólim deńgeıiniń udaıy joǵary bolýynan 2 mln 200 myń adamnan, ıaǵnı barlyq qazaq halqynyń 48 prosentinen aıyryldy» degen qorytyndy shyǵardy. Ashtyqtan, negizinen, jas balalar men áıelder qyryldy. Osy sebepti qazaqtardyń ósýi qatty tejeldi. Keıin bul ashtyq «qyzyl qyrǵyn», «goloshekındik genosıd» degen ataýǵa ıe boldy, – dedi oblys ákimi.
Demograf-ǵalymdardyń zertteýinshe oblystyń ózinde 4500 adam jazyqsyz repressııaǵa ushyrap, sottalǵan eken. Olardyń 1153-i atý jazasyna kesilgen. Qazaqstanǵa ózge memleketterden myńdaǵan adam jer aýdarylǵan. Olarda zulmat jyldardyń azabyn qazaqtarmen birge tartty.
Mıtıngte oblystyq ardagerler keńesiniń tóraǵasy Serik Dúısenbaev, koreı etnomádenı birlestiginiń múshesi, deportasııa qurbanynyń urpaǵy Valerıı Pak sóz sóılep, keshegi surapyl kúnderdi jadydan shyǵarmaýǵa, jazyqsyz jazalanǵan jandardy umytpaýǵa shaqyrdy.