Qostanaı oblystyq Polısııa departamenti Baspasóz qyzmetiniń mamany Kenje Qonysbaıdyń aıtýyna qaraǵanda, bul qurylǵymen óńirdegi 222 ýchaskelik polısııa ınspektory qamtamasyz etilgen. Mundaı qyzmet turǵyndardyń ýchaskelik polısııa qyzmetkerimen tikeleı baılanysýyna jáne ótinishterge dereý jaýap alýǵa múmkindik beredi.
Búginde oblystyq Polısııa departamentinde QR IIO jańǵyrtý boıynsha Jol kartasyn júzege asyrý sheńberinde 2019-2021 jyldarǵa arnalǵan halyqpen keri baılanystyń pármendi arnalaryn qurýǵa baǵyttalǵan birqatar is-shara qarastyrylǵan.
Endi oblys turǵyndary ýchaskelik polıseıdiń nómirin PIK jáne baspasóz betteri men býkletter, vızıt jáne úılerdiń kireberisterindegi habarlandyrýlar arqyly biletin bolady.
Qyzmettik uıaly telefonǵa ıe bolǵan tártip saqshylary birden halyqpen baılanys ornatýǵa kóshipti. Olar jurt arasyna shyǵyp, óz nómirlerin úlestirgen. Máselen, «Aqsý» tirek pýnktiniń polıseıi Meırambek Baısalbekov ózine qarasty Drýjba aýlynyń turǵyndarymen kezdesip úlgerdi. Bul jańashyldyqty aýyl turǵyndary qýanyshpen qabyldady.
Erli-zaıypty Rýdlof jáne Zoıa Kımder ýchaskelik polıseıdiń nómirin birinshi bolyp jazyp aldy. Aıtýlarynsha, aýyldy jerde turǵan soń ári zeınetke shyqqasyn tártip saqshylarynyń kómegine jıi júginedi.
- Aýyldyq jerde kóshede beınebaqylaý nemese jaryq joq, sondyqtan ury-qara kóp júredi. Jasymyz da kelip qalǵan soń kúshimiz jete bermeıdi, sondaıda ýchaskelip polıseıdi shaqyramyz. Olar basqa jerde júrgende nemese tún ýaqytynda 102-ge habarlasa almaımyz, al jeke nómir arqyly qysy-jazy, kúni-túni habarlasyp, alańsyz otyratyn boldyq, - deıdi Drýjba aýylynyń turǵyndary.