Almaty memlekettik qýyrshaq teatrynda kıeli óner tabystyryp, ómirde de qol ustasyp qatar kele jatqan 11 otbasy bar. 30 akteri bar shaǵyn ujym úshin az emes. Qýyrshaqtardy qımyldatyp, bala daýysymen neshe túrli jan-janýarlar men qustardyń únin, minezin salyp ándetip, bıletip júrgen akterlik ónerdiń aýyr salmaǵy men qyzyqty jumysyna bas suqqan erli-zaıyptylar óz shańyraǵynda da berekesi tasyǵan, birligi berik jup ekenin «Baqytty otbasy» teatrishilik baıqaýynda bar qyrynan dáleldeı tústi. Teatrǵa kelgen ár balanyń júregine tereń úńilip, sezim pernesin tap basa alatyn talantty ártisterdiń tórt juby óz balalarymen birge top quryp, otbasylyq saıys kórigin qyzdyrǵanda, teatrdaǵy áriptesteri birdeı jankúıerlik jasap, ortaq jeńis tiledi. Saıysqa túskenderdiń jas ereksheligi de, otbasylyq quramy da ártúrli: Momynjanovtar tórt balanyń ata-anasy bolsa, jańadan shańyraq kótergen Joldashanovtardyń bóbegi besikten belin endi kótergen. Otbasy tárbıesindegi qaǵıdalardy negizge ala otyryp, keleshek urpaqqa mardymdy tárbıe berýdi maqsat etken jeti bólimnen turatyn saıysta baq synaǵan ónerli juptar óz ujymy aldynda jańa qyrlarymen tanylyp qana qoımaı, baıqaý qorytyndysynda qomaqty qarjylaı syılyqtardy da oljalady.
«Baqytty otbasy» saıysynyń 3-ornyn belgili teatr ártisteri Bolat jáne Ulbosyn Momynjanovtar otbasy ıelendi. Kórermenin harızmaǵa toly bı men erekshe ıdeıamen oılastyrylǵan beınejazbalarymen baýrap alǵan úlgili otbasy yntymaqtarynyń beriktigin kórsetti. Baıqaýdyń júldeli 2-ornyn teatrdyń dybys ınjeneri Arshyn jáne teatr aktrısasy Gúlbarshyn Joldashanovtardyń otbasyna buıyrdy. Kórermender men qonaqtardy tartymdy tanystyrýymen, jalyndarymen tánti etken úıelmen kórermender kózaıymyna aınalyp úlgerdi. Saıystyń júldeli 1-ornyna teatr ártisi Shoqan men «Kórermendermen jumys» bóliminiń qyzmetkeri Juldyz Qulnazarovtar ıe boldy. Áserge toly bıimen, erekshe oıyn úlgilerimen kózge túsip saıystyń kórigin qyzdyra tústi. Al «Baqytty otbasy - 2019» teatrishilik baıqaýynyń bas júldesine teatrdyń beldi ártisteri, úlgili juptardyń biregeıi Altaı jáne Maral Táýekelovterdiń áýleti laıyq dep tanyldy. Otbasylaryn tanystyrý talabyn óz mamandyqtarymen baılanysty etip daıyndaǵan beınetýyndylary kópshiliktiń tańdanysyn týdyryp, otbasynyń aýyzbirshiligin, bir-birine degen sezimderiniń kirshiksiz tazalyǵyn keremet kórinistermen baıandap berdi.
Almaty memlekettik qýyrshaq teatrynyń dırektory Talǵat Qamqabaıuly «qundylyqtar quldyraǵan qoǵamda baqytty otbasylardy úlgi etip kórsetý, óner men ómirdi ushtastyryp júrgen otbasylardy nasıhattaý – áleýmettik derttiń aldyn alý jolyndaǵy tıimdi tásil» degen pikir bildirdi. Ulttyń bolmysyn bıiktetip, urpaqtyń qajetine jaraıtyn osyndaı tárbıelik sharalar barlyq jerde jalǵasyn tabýǵa ábden laıyqty.
ALMATY