Senim – eń kúshti qarý

Kip-kishkentaı balalardyń, tipti keıbiriniń dúnıe esigin ashpaı jatyp ta aýyr dertke shaldyǵyp, basyna túsken taǵdyr synaǵyn úlkendershe moıymaı kóterip kele jatqan myqtylyǵyn erlikke balamasqa amalyń joq. Uly fılosoftardyń biri Ber­told Breht te «О́nerdiń barlyq túri eń uly ónerge – jer betinde ómir súrý ónerine qyzmet etedi» dep beker aıtpasa kerek. Birneshe ret hımııaterapııadan ótip, aýyr ýkoldar men tabletkalar­dan júregi ábden shaılyqsa da, ómirdiń bir kúndik jaryq sáýlesi úshin shydamdylyq tanytyp, qabyldaýǵa tıis ekenin tıtteı zerdesimen túısinetin baldyrǵandardyń ár kúni úmit pen senimge, kúdik pen kúreske toly.

M.Áýezov atyndaǵy Qazaq mem­lekettik akademııalyq drama teatrynyń sahnasynda qoıylǵan qazaqstandyq sazger Iýlııa Lebedevanyń «Mýzykanyń arǵy jaǵynda» dep atalatyn mýzykalyq ertegi spektakliniń basty ereksheligi – rólderde jas akterler oınaıdy. Bul ba­lalardyń árqaısysy derlik onkologııa dertine shaldyǵyp, uzaq ári aýyr kúres jolyn júrip ótken. Keıbir balalardyń áli emdelip júrgenin eskersek, bul jobanyń qanshalyqty qymbat ári qajet ekenin baǵamdaýǵa bolady.

Drama teatrynyń sahnasynda ótken spektakldegi bas­ty rólderdiń birin barshaǵa esimi tanymal jas oryndaýshy Danelııa Tóleshova oınady. Ol qaıyrymdylyq jobasyna qatysa otyryp, kúrdeli aýrýlarmen kúresýge májbúr bolǵan bala­larǵa qoldaý kórsetkisi keletinin aıtty.

«Shyǵarmashylyq qanaty­men» jobasynyń avtory, «Ǵy­lymı-medısınalyq qoǵam» qo­ǵamdyq birlestiginiń tóraǵasy Sýrııa Esentaeva:

– Bizdiń birlestikti 2013 jyl­dyń sońynda tájirıbeli dári­gerler qurdy. Bilim berý jáne ǵylymı-zertteý jobalarymen qatar, biz áleýmettik jobalarmen de aınalysamyz. Osy jumysty atqara júrip, biz onkologııalyq aýrýlarmen kúresý asa kúshti rýhty jáne kúsh-qýatty qajet etetinin, al osy aýrýǵa tap bolǵan otbasy músheleri psıhologııalyq jáne moraldyq qoldaýǵa zárý ekenin túsindik,– deıdi.

2017 jyly «Ǵylymı-medı­sınalyq qoǵam» birlestigi «Shy­­ǵarmashylyq qanatymen» atty jobany iske qosqaly beri Ǵylymı pedıatrııa jáne balalar hırýrgııasy ortalyǵynyń naýqastaryn akterlik sheber­likke, dekorasııalar men kos­tıýmder jasaýǵa, jalpy teatr ónerine baýlyp keledi. Jobanyń birinshi jylynyń qorytyndysy boıyn­sha M.Áýezov atyndaǵy Qazaq memlekettik drama teatry­nyń sahnasynda «Móldir qudyq» atty mýzykalyq ertegi qoıylǵan edi. Onkologııalyq aýrýǵa shaldyqqan balalar akter retinde ról somdap, bıletterdi satýdan túsken búkil qarjy olar­dyń emin jalǵastyrýǵa ba­ǵyt­taldy. 2018 jyly Astana­daǵy Elshiler jubaılary dıp­lomatııalyq klýbynyń «ASA» qaıyrymdylyq komıte­ti­niń qoldaýymen Almaty qala­syn­daǵy Oqýshylar saraıyn­da «Batyr vaksına» atty spek­takl qoıylyp, onda taǵy da kishkentaı naýqas balalar ról­derde oınaǵan bolatyn. Eki spektakl de naýqastardyń tarapynan jyly qabyldanyp, oǵan qatysý balalardyń jalpy hal-ahýalyna ońynan áser etip, emdelý nátıjesiniń jaqsara túskeni baıqalǵan-dy.

Balalar onkologııasynda bastalǵan osy ıgi bastama, endi mine, Iýlııa Lebedeva jazǵan «Mý­zykanyń arǵy jaǵynda» dep atalatyn mýzykalyq erte­gisimen jalǵasyn taýyp otyr. Buǵan Mádenıet jáne sport mınıstrligi de qoldaý kórsetip, spektakldiń tusaýkeseri úshin M.Áýezov atyn­daǵy akademııalyq drama teatrynyń sahnasyn, al repetısııa jasaý úshin Ǵ.Mú­sirepov atyndaǵy Balalar jáne jasóspirimder teatrynyń sahnasyn usyndy. Sonymen qatar Aqparat jáne qoǵamdyq damý mınıstrligi men Almaty qalasy ákimdigi de mýzykalyq erteginiń tusaýkeserine óz qoldaýyn bildirdi.

Jobanyń kórkemdik jetek­shisi Nurııa Qojamuratova: «Uzaq ári kúrdeli emnen ótken balalardy ońaltý jáne áleýmettendirý birjolǵy is emes, ony turaqty túrde júrgizip turý qajet. Qa­zir­gi tańda biz balalarǵa ak­ter­lik sheberlikti úıretetin «Shy­ǵarmashylyq qanatymen» atty shaǵyn art-terapııa stýdııasyn ashtyq. Teatr – kópqyrly óner, oǵan beıneleý óneri, mýzyka, modeldeý, akterlik sheberlik, bı syndy óner túrleri kiredi. Kúrdeli jáne sırek aýrýlarǵa shaldyqqan balalarǵa arnalǵan art-terapııalyq jobamyzdy tolyǵymen júzege asyrý úshin árbir bala men eresekke (ba­la­lardyń ata-analary jáne onko­logııaǵa shaldyqqan eresek naý­qastarǵa) ózderiniń júregine jaqyn shyǵarmashylyq baǵytty tańdaýǵa múmkindik beretin Art-terapııa ortalyǵyn barlyq aımaqta qurý qajet», deıdi.

Sondaı-aq teatrda uıymdas­tyrylǵan balalardyń sýret kórmesiniń de aıtary mol. Qol ustasyp kúlimdegen ata-anasyn, shattyqqa bólengen baýyrlaryn, yntymaqty dostaryn, ádemi ári eńseli týǵan úıin qyzyldy-jasyl ashyq túspen beınelegen balalar ómirdiń jarqyn, ǵajap, qymbat ekenin bárimizden góri jaqsyraq sezetinin boıaý tilimen barynsha uǵyndyrǵan.

Onkologııany jeńgen balalar sahnada ról oınaý arqyly áli emdelip júrgen, moraldyq qana emes, materıaldyq kómekke de muqtaj balalarǵa qolushyn sozyp, úmit pen ónerdiń ajaldy jeńip shyǵar kúshi baryna sen­dirip otyr. Al senim – eń kúshti qarý.

ALMATY