Osyndaı sensasııalyq jańalyqty Shyǵys Qazaqstan oblysy ákiminiń orynbasary Ásem Núsipova óziniń feısbýktegi paraqshasynda jazdy. «Búgin, saılaý kúninde belgili arheolog Zeınolla Samashev oblys ákimi Danıal Ahmetovke Ulan aýdany aýmaǵyndaǵy Aqbaýyr úńgiriniń mańynan (Besterek aýyly) osyndaı sensasııalyq jańalyq ashylǵanyn habarlady» deıdi oblys ákiminiń orynbasary.
Biz bul jańalyqty estigen soń birden arheolog Zeınolla Samashevke telefon shaldyq. «Bul – ejelgi saqtardyń qonysy. О́te qundy eskertkish. Qundylyǵy, bizde saqtardyń qonystary joq qoı. Eldiń bári saqtardy kóshpeli, anda-munda kóship júrgen dep oılaıdy. Sondaı stereotıp qalyptasqan. Bul eskertkish olardyń otyryqshy bolǵandyǵyn, eginshilikpen shuǵyldanǵandyǵyn kórsetip otyr. Qazba barysynda bıdaıdy untaqtaıtyn quraldar tabyldy. Olardyń meken etken dóńgelek úıleriniń oryndary shyqty. Bul - úlken qonys. Biz sonyń tórtten bir bóligin bastap qazyp jatyrmyz. Eki-úsh kúnnen keıin «Eleke sazyna» ketetindikten mundaǵy qazba jumystaryn kelesi jyly jalǵastyramyz» degen arheolog bul qonystyń kólemi shamamen 3084 sharshy metr ekendigin, mundaı eskertkish Shyǵys Qazaqstan aýmaǵynan tuńǵysh tabylyp otyrǵandyǵyn jetkizdi.
«Bul - asyqpaı, 6-7 jyl qazylatyn dúnıe. Saqtar dáýiriniń alǵashqy kezeńine jatatyn qonys. Bul - malshylyqpen, qolóner isimen birge eginshilikpen, ken óndirý isimen shuǵyldanǵan saqtardyń bir toby. Tabylǵan qumyra synyqtarynyń ózi myńnan asady. Onymen qatar jebe, pyshaq sekildi ótkir quraldardy qaıraıtyn qaıraqtar tabyldy. Eń qundy jádiger – dándi-daqyldardy untaqtaıtyn dıirmen. Qazaqtyń dıirmeni dóńgelek pishindi bolsa, bul tekshe» deıdi Z.Samashev.
Arheologtyń aıtýynsha, bul eskertkishtiń tabylýyna oblys ákimi Danıal Ahmetov sebepker bolypty. Ol kisi byltyr arheologqa «osy jerdi qazyp kórshi, astynda birdeńe bar sekildi» degen eken. «Qazsaq, saqtardyń qonysy bolyp shyqty. Ǵajap!» dep tańdanady Zeınolla Samashev.
Shyǵys Qazaqstan oblysy
Ulan aýdany
Sýretter Ásem Núsipovanyń feısbýktegi paraqshasynan alyndy