Prezıdent Arhıviniń dırektory Jámılá Ábdiqadyrovanyń quttyqtaý sózimen ashylǵan jıynǵa Reseı memlekettik gýmanıtarlyq ýnıversıteti Tarıh-arhıv ınstıtýtynyń kafedra meńgerýshisi, professor Mıhaıl Ların, Polsha Respýblıkasynyń Almaty qalasyndaǵy Bas konsýly Mıhaıl Bogdanovıch, Reseı Federasııasynyń Almaty qalasyndaǵy vıse-konsýly Bagır Mamıev, Polshadaǵy Marııa Skladovskaıa-Kıýrı ýnıversıtetiniń arhıvtaný jáne qosymsha tarıh pánderi kafedrasynyń dosenti Artýr Gorak, Aqparat jáne ákimshilik tehnologııalar ınstıtýtynyń dırektory, professor Borıs Japarov postkeńestik elderden jıylǵan jas arhıvshilerdiń jumysyna sáttilik tilep, ózara yntymaqtastyqty arttyryp, tájirıbe almasýdy áli de tereńdete túsýdiń negizinde tıimdi ortaq nátıjege qol jetkizýge bolatynyna toqtaldy.
Jas arhıvshilerdiń jazǵy mektebi TMD elderi arhıv mekemeleriniń mamandary úshin jańa zamanaýı formattaǵy kásibı bilim alatyn alań bolyp tabylady. Prezıdent Arhıviniń bastamasymen, ál-Farabı atyndaǵy Qazaq ulttyq ýnıversıtetiniń qoldaýymen uıymdastyrylyp otyrǵan Jazǵy mektep qatysýshylarynyń sıfrly aqparat pen elektrondy qujattardy arhıvtegi is júrgizý jumysyna paıdalanýdyń tóńireginde bir-birine úıreteri az emes. Osydan on-on bes jyl burynǵy saǵattap, tipti táýliktep kútýge májbúr bolatyn tapsyrys berýshilerdiń suraǵan kitaptary men qujattaryn arbaǵa tıep ákep, taratatyn tásil kelmeske ketip barady. Arhıv qujattaryn elektrondy nusqaǵa kóshirip, qajetti qujatty qınalmaı taýyp alýǵa múmkindik beretin búgingi sıfrly ádisti ıgerý eń aldymen arhıvshiler úshin qajet ekeni ár tarıhshynyń dárisinde túrli mysaldarmen tarqatylyp jatty. Bir sózben aıtqanda, bıylǵy mektep dáristerinde arhıvterdi sıfrly júıemen qamtamasyz etý, elektrondy qujattardyń saqtalýy, kúndelikti arhıv qyzmetinde zamanaýı aqparattyq tehnologııalardyń engizilýi men paıdalanylýy máselelerine kóp kóńil aýdarylǵan.
Is-shara baǵdarlamasy asa baı, onda pikirsaıys-talqylaýlar, sheberlik saǵattary, iskerlik oıyndar, tusaýkeserler, sonymen qatar Qazaqstannyń memlekettik arhıvterimen tanystyrý jaǵy qamtylǵan.
Qatysýshylardyń nazaryna zamanaýı arhıv jabdyqtary men kompıýterlik tehnıkalar usynyldy. Is-shara qatysýshylaryna arnaıy FeebMe mobıldi qoldanbasynda jeke keńistik ashyldy. Onyń kómegimen qatysýshylar elektrondy tirkeýden ótip, qajetti aqparatqa qol jetkizip qana qoımaı, spıkerlerge onlaın suraqtar qoıyp, pikirler men jazbalar qaldyra alady.
ALMATY