Marqum Qaıyrjan Hasanov búkil ǵumyrynda Batys Qazaqstan, sonyń ishinde Qaratóbe óńiriniń tarıhyn tirnektep jınaǵan ólketanýshy edi. Osydan bir jyl buryn dúnıeden ótken eńbekqor ǵalymdy týǵan jerinde jerlesteri saǵyna eske aldy. Keshte Qaıyrjan Hasanovtyń ómir joly men shyǵarmashylyǵy jaıly kórme usynylyp, derekti fılm kórsetildi.
– Qaıyrjan Hasanov óz ómiri men shyǵarmalyǵy arqyly baıandy ómir súrýdiń úlgisin kórsetip ketken jan edi, – deıdi Qazaqstannyń eńbek sińirgen mádenıet qyzmetkeri, aıtys aqyny Sholpan Qydyrnııazova.
Qaıyrjan Hasanov kóziniń tirisinde ólke tarıhyna qatysty júzdegen kitap shyǵardy. Ásirese saıası qýǵyn-súrginge ushyraǵan tulǵalar týraly kóp izdendi. 1930 jyldardaǵy náýbette onyń óz atasy – alǵashqy halyq muǵalimderiniń biri bolǵan Tólegen Imanǵazıev te «halyq jaýy» atanyp, atylyp ketken bolatyn. Qaratóbede ótken Alash sezine qatysqany úshin aıypty bolǵan halyq muǵaliminiń ómir jolyna qatysty arhıv derekterin talmaı izdep, taýyp túgendegen Qaıyrjan aǵa ol qyzmet etken Sáýle aýylyndaǵy mektepke eskertkish taqta da ornatqan edi. Odan bólek, ólketanýshy «Alashorda. Atylǵan arystar» atty kitap jazdy, Medesh Oraldıev, Qarabaı Kózeev, t.b. aty-jóni umytylǵan alash qaıratkerleriniń esimin jańǵyrtty. Sanasy sergek, qalamy júırik qalamger ómiriniń aqyryna deıin qolynan qalamyn túsirmedi. Avtordyń aıaqtaı almaı ketken keıbir eńbegin urpaqtary túıindep, oqyrman qolyna tıgizgeni óte órnekti is boldy.
Batys Qazaqstan oblysy