«Memleket densaýlyq saqtaý salasyna ıaǵnı, halyqqa kórsetiletin tegin medısınalyq qyzmetterge jyl saıyn bir trıllıon teńgege jýyq qarjy bóledi. 2017 jyly salaǵa jalpy memleket pen azamattardyń jeke shyǵyndaryn qosqanda 1 trln 759 mlrd teńge shyǵyn jumsalǵan. Onyń 40 prosenti nemese 550 mlrd teńgesi – halyqtyń «qaltasynan» shyqqan qarajat. Iаǵnı, azamattardyń jeke shyǵyndary 2010 jylmen salystyrǵanda 3 ese artqan. Keler jyldan bastap engiziletin saqtandyrý júıesi osy shyǵyndardyń ósý qarqynyn tómendetýge kómektesedi», dedi mınıstr.
Aıtýynsha, saqtandyrý arqyly ómir boıy qarjy tapshylyǵynyń zardabyn tartyp kele jatqan konsýltatıvtik-dıagnostıkalyq qyzmetterdi qarjylandyrý deńgeıin úsh ese arttyramyz. Mysaly, biz qazir salalyq mamannyń konsýltasııasyna 700 teńge tóleımiz, al, naryqta onyń quny shamamen 5-6 myń teńge turady. Memlekettik emdeý mekemelerinde bilikti mamandardyń turaqtamaý sebebi osynda. Al, saqtandyrý júıesi iske qosylǵannan keıin tarıfterdi 15 prosentke ósirýge múmkindik týady», - dedi Eljan Birtanov saladaǵy reformalardy talqylaýǵa arnalǵan jıynda.
Biraq bul medısınalyq qyzmet baǵasy qymbattaıdy degen sóz emes. Tarıf tek memleket pen emdeý mekemeleriniń arasyndaǵy prosedýra, dep qosty ol.
Sonymen qatar, baǵasy qymbat bolyp keletin qyzmetterdiń kólemi de artpaq.
«Qazir biz memlekettik tapsyrys sheńberinde jasalatyn operasııalarǵa belgili bir shekteý qoıýǵa májbúrmiz. Lımıtten artyq otaǵa aqsha tóleı almaımyz. Al, medısınalyq saqtandyrý engizilgennen keıin memlekettik tapsyrysty ósiremiz», dep atap ótti mınıstr.