Májilis Tóraǵasynyń orynbasary Jánibek Káribjanov Birikken Ulttar Uıymynyń Ortalyq Azııadaǵy bosqyndar máselesi boıynsha Bas komıssary basqarmasy ókildiginiń basshysy Saber Azammen kezdesti, dep habarlady osy palatanyń baspasóz qyzmeti.
Májilis Tóraǵasynyń orynbasary mártebeli meımandy jańa qyzmetke taǵaıyndalýymen quttyqtap, bosqyndar máselesi Qazaqstan saıasatynyń basym baǵyttarynyń biri ekendigin atap kórsetti. О́tken jyldyń aıaǵynda qabyldanǵan “Bosqyndar týraly” zańnyń jobasyn jasaý kezinde Birikken Ulttar Uıymynyń bosqyndar komıssııasynyń ókilderi aralasyp, olardyń biraz usynystary qabyldanǵan. Transshekaralyq aımaqta otyrǵan memleketter shekarashylarmen jumysty jandandyryp, anyqtaý baǵytynda úlken jumystar atqarylǵanyn, bul salada qol jetkizilgen jetistikter barshylyq ekenin aıtqan vıse-spıker Birikken Ulttar Uıymynyń Ortalyq Azııadaǵy bosqyndar máselesi boıynsha Bas komıssary basqarmasy ókildigi basshysynyń bizdiń aımaqta bastalǵan jumysyna sáttilik tiledi.
Meıman óz kezdesýiniń halyqtyq demokratııanyń kózi men qulaǵy bolyp tabylatyn Májilisten bastalǵanyna rızashylyq bildirip, aldaǵy ýaqytta Parlamentpen tyǵyz baılanysta bolatyndyǵyna sendirdi. Aldaǵy qazan aıynda Bishkek qalasynda aralas bosqyndar máselesine qatysty konferensııa ótkizetindikterin habarlady. “Bizdiń strategııamyz qashanda Úkimetpen birge bolýda, Parlamentten moraldyq qoldaý kútemiz”, – dedi ol.