Tótenshe jaǵdaıdan zardap shekken Arys qalasyna elimizdiń ár aımaǵy qol ushyn sozyp, qaıǵy men qıyndyqty bólisip alyp ketti. Sonyń bir kórinisindeı, Arys qalasyndaǵy orta mektepterdiń 50 oqýshysy Batys Qazaqstan oblysyna demalýǵa keldi. Olardy Oral temirjol vokzalynan «Daryn» qosymsha bilim berý ortalyǵynyń dırektory Gúlsim Ǵabdýlǵazızqyzynyń ózi qarsylap aldy.
Arys balalary on kún boıy demalatyn bul lager – erekshe oryn. Tabıǵattyń ásem múıisinde ornalasýynan bólek, lagerde oqýshylar qazaq, orys, aǵylshyn tilderin úırenip, sheteldik dostar tabady. Sheteldik dep otyrǵanymyz, Reseı Federasııasynyń Samara oblysynda turatyn qandastarymyzdyń «Aqjol» aımaqtyq qazaq ulttyq-mádenı avtonomııasy reseılik qazaq balalaryn jazǵy kanıkýl kezinde atajurtqa jiberýdi dástúrge aınaldyrǵan. Bul joly olardyń qaımaǵy buzylmaǵan túrkistandyq balalarmen birge demalýy eki jaqqa da paıdaly bolary anyq.
- Arystan kelgen balalardyń jazǵy demalysyn uıymdastyrýǵa «Jaıyq Munaı Gaz» JShS, «»Aqjaıyq» fýtbol klýby, «RIAMIR», «Kinoplexx West» JShS-lary, «Oral Zenıt zaýyty» AQ, Batys Qazaqstan oblystyq Qazaqstan halqy assambleıasy jáne Qadyr Myrza Álı atyndaǵy mádenıet jáne óner ortalyǵy demeýshilik kórsetti, - deıdi oblystyq bilim basqarmasynyń baspasóz hatshysy Úmit Jáńgirova.
Arystyq jáne reseılik oqýshylar osy kúnderi Oral qalasynyń kórneki jerlerin aralap, mýzeılermen de tanysady.
Batys Qazaqstan