Parlament Senatynyń Tóraǵasy Qasym-Jomart Toqaevtyń tóraǵalyq etýimen ústimizdegi jylǵy 14-16 mamyrda Almatyda ótetin “EQYU-nyń eýrazııalyq ólshemi” Transazııalyq parlamenttik jıynyn ázirleý jáne ony ótkizý jónindegi Uıymdastyrý komıtetiniń otyrysy boldy. Qazaqstannyń EQYU-ǵa tóraǵalyq etýi aıasynda ótetin bul shara osy Uıymnyń járdemimen júzege asady dep kútilýde.
Jıyndy ázirleý jáne ony ótkizý jónindegi sharalar josparynyń oryndalý barysy týraly Uıymdastyrý komıteti jumys tobynyń jetekshisi, Senat Apparatynyń basshysy Murat Nurtileýov baıandady. Jıyn baǵdarlamasynda úsh: “О́ńirlik qaýipsizdik (Aýǵanstan, terrorızm jáne esirtki tasymalymen kúres, qarýsyzdaný)”, “Eýrazııa: jańa rynoktar jáne qaterlerdiń arta túsýi (ekonomıkalyq damý, saýda, resýrstardy basqarý, eńbek kóshi-qony, qorshaǵan ortany qorǵaý salasyndaǵy máseleler)” jáne “EQYU-nyń adamı ólshemderi (dinı toleranttylyq, saıası damý, adamdar saýdasymen kúres, genderlik teńdik)” sessııalaryn ótkizý qarastyrylǵan.
Transazııalyq parlamenttik jıynǵa álemdik qoǵamdastyqtaǵy elderdiń ulttyq parlamentteri men halyqaralyq uıymdardan 350-ge jýyq delegat keledi dep kútilip otyr. Uıymdastyrý komıtetiniń tóraǵasy Qasym-Jomart Toqaev elimizdiń EQYU-ǵa tóraǵalyq etýi aıasyndaǵy Transazııalyq parlamenttik jıynnyń Qazaqstanda ótýiniń saıası zor mańyzyna otyrysqa qatysýshylar nazaryn aýdardy. “Bul jıyn parlamentaralyq únqatysý men yntymaqtastyqty odan ári keńeıtýge, EQYU-nyń basty mindetterin sheshýde parlamentshilerdiń is-qımylyn belsendilendirý men rólin arttyrýǵa baǵyttalady”, – dedi Q.Toqaev, dep habarlady Parlament Senatynyń baspasóz qyzmeti.