Qalany qalpyna keltirý jumystaryna atsalysý úshin eriktiler bardy. Budan bólek munaıly aımaqtyń kómegimen Arysta 482 úı qalpyna keltiriledi. Sonyń ishinde 24 úı turýǵa múlde jaramsyz dep tanylǵan. Terezeleri synyp, tóbeleri qulaǵan, ishi qıraǵan basqa turǵyn úıler qazir jóndelip jatyr. Arysqa jumys saparymen barǵan Premer-Mınıstr Asqar Mamınge Atyraý oblysynyń ákimi Nurlan Noǵaev osy jumystar jóninde baıandady.
– Oblys ákiminiń orynbasary jetekshilik etetin vedomstvoaralyq top turǵyn úılerdi qalpyna keltirý jumystary aıaqtalǵanǵa deıin Arysta bolady, – dedi Nurlan Noǵaev. – Jóndeý jumystaryna tehnıkalar men 500-ge jýyq adam tartyldy. Qazir oblys úlesindegi sektorda jumys qarqyndy júrip jatyr.
Qurylys jumystaryn júrgizip jatqan merdiger mekemelerdiń basshylarymen keńes ótkizgen oblys ákimi eń aldymen sapaǵa kóńil bólý kerektigin eskertti. «Arys, biz birgemiz» aksııasyna qatysýshy retinde jaǵdaı tolyq rettelgenshe kómek berý sharalaryn jalǵastyra beremiz», degen óńir basshysyna Arys turǵyndary rızashylyqtaryn bildirdi. Qala turǵyny Bıbihadısha Momyn: «Syn sátte shet qalmaı, qoldaý kórsetkenderińizge rahmet. Úılerimiz jóndelip, qonystanǵannan keıin atyraýlyqtardy qýana qonaqqa shaqyramyz», dedi.
Munaıly aımaqtyń qamqorlyǵynan Arystaǵy mektep oqýshylary da qalys qalmady. Oblys ortalyǵynyń mańyndaǵy «Tulpar» lagerinde qazir arystyq 50 bala demalyp jatyr. Shilde aıynyń sońyna qaraı taǵy da 50 oqýshy keledi. Oblystyq bilim berý basqarmasynyń bólim basshysy Almagúl Qaıyrlıevanyń aıtýynsha, lagerde balalardyń alańsyz demalýlary úshin barlyq jaǵdaı jasalǵan. Ystyq tamaqpen, kıim-keshekpen qamtylady, túrli sporttyq, mádenı sharalarǵa qatysady. Demalys baǵdarlamasyna ortaǵasyrlyq Saraıshyq qalasynyń ornyndaǵy keshenge barý, Jaıyq ózeninde kememen saıahattaý, oblys ortalyǵyndaǵy mádenı oryndardy, kórikti jerlerdi aralaý da engizilgen. ATYRAÝ