Bıyl aqyn, jazýshy, memleket qaıratkeri Sáken Seıfýllınniń 125 jyldyǵy respýblıka boıynsha atalyp ótedi. Qaraǵandy oblysynda birqatar shara josparlanǵan.
«Oblys mektepteriniń oqýshylarynyń qatysýymen «Sáken oqýlary» ótti. Sondaı-aq aýdandyq teatrlar baıqaýy, aqyndar men jazýshylar arasynda doda, án baıqaýy uıymdastyryldy. Jańaarqa aýdanynda biz alǵash ret «Arqanyń sal-serileri – 2019» atty oblystyq aqyndar men ánshiler saıysyn uıymdastyrdyq. Oblystyń barlyq mýzeıi men kitaphanasynda jyl sońyna deıin semınarlar, dóńgelek ústelder, kitap kórmesi jáne taqyryptyq kórmeler ótedi. Barlyǵy 60-tan astam mereıtoılyq shara ótkizýdi josparlap otyrmyz», dedi Erkebulan Aǵymbaev.
Ol sondaı-aq jazýshynyń 125 jyldyǵyna oraı oblystyq tarıhı-ólketaný murajaıy zertteý jumystaryn júrgizetinin atap ótti. Nátıjesinde Sáken Seıfýllınniń ómiri men qyzmeti týraly monografııa shyǵarylady. S.Seıfýllın atyndaǵy teatr jáne Jezqazǵannyń Qojamqulov atyndaǵy Qazaq mýzykalyq teatrynda Joltaı Álmashevtiń «Sákenniń sońǵy sapary» jáne «Sákenniń sońǵy sátteri» atty jańa spektaklderi qoıylady.
«Sáken Seıfýllınniń 125 jyldyǵyna arnalǵan basty shara 20 qyrkúıekte Qaraǵandydaǵy ortalyq saıabaqtyń sahnasynda ótedi. Bul kúni onda qazaqstandyq estrada juldyzdarynyń qatysýymen úlken konsert bolady. Sondaı-aq kórmeler, oıyndar, teatrlandyrylǵan qoıylym uıymdastyrylady. Munymen shektelmeıdi. Kúzde respýblıkalyq ǵylymı-tájirıbelik konferensııa josparlanǵan. Ony oblystyq Tilderdi damytý jónindegi basqarma QarMÝ-men birlesip uıymdastyrady. Qarasha aıynda oblys ákiminiń kýbogy úshin jarys ótedi. Oblystyq sport jáne dene shynyqtyrý basqarmasy shahmattan respýblıkalyq chempıonat uıymdastyrady. Al Shet aýdanynda «Salbýryn» respýblıkalyq týrnıri men «Dala daýysy» atty halyq ánderin oryndaýshylar arasynda baıqaý ótkiziledi», dedi Erkebulan Aǵymbaev.
Mereıtoıǵa oraılastyrylǵan saltanatty sharalar Sáken Seıfýllın týraly derekti fılm kórsetilimimen aıaqtalady. Kartınanyń premerasy jyl sońyna josparlanǵan.