QR Premer-Mınıstri Asqar Mamın Túrkistan oblysyna jumys sapary barysynda Arys qalasynyń zalal keltirilgen úılerin, áleýmettik nysandaryn, ınjenerlik jelilerin salý jáne jóndeý jumystarynyń barysyn tekserdi, sondaı-aq qalany qalpyna keltirý jóninde keńes ótkizdi.
QR Úkimetiniń basshysy áskerı qalashyqtyń turǵyn aımaǵyn qarap, I. Jýrba atyndaǵy mektepti, qalalyq aýrýhanany, temir jol vokzalyn, turǵyn úılerdi qalpyna keltirý, ortalyq stadıondy rekonstrýksııalaý jumystarynyń nátıjelerimen tanysty.
QR Premer-Mınıstri keńes ótkizdi, onda QR Tuńǵysh Prezıdenti – Elbasy N. Nazarbaevtyń jáne Memleket basshysy Q. Toqaevtyń Arys qalasyn qalpyna keltirý jónindegi tapsyrmalaryn oryndaý barysy qaralyp, qurylys-jóndeý jumystarynyń qorytyndysy shyǵaryldy.
Qysqa merzimde Arys qalasynda úlken aýqymdy jumys atqaryldy. Qalanyń 90%, sonyń ishinde, tirshilikti qamtamasyz etetin nysandar men ınfraqurylymdary qalpyna keltirildi. 6,5 myńnan astam turǵyn úı qalpyna keltirilip, 6,5 myń otbasy jóndelgen úılerine kirdi. Barlyq ınjenerlik ınfraqurylym tolyq jóndeýden ótkizildi. Kósheler aýqymdy túrde rekonstrýksııalandy. 62 áleýmettik nysan, sonyń ishinde – aýrýhanalar, mektepter, balabaqshalar, sport obektileri 20 tamyzǵa deıin daıyn bolady.
QR qorǵanys mınıstri N. Ermekbaev, ishki ister mınıstri E. Turǵymbaev, densaýlyq saqtaý mınıstri E. Birtanov, bilim jáne ǵylym mınıstri A. Aımaǵambetov, ındýstrııa jáne ınfraqurylymdyq damý birinshi vıse-mınıstri Q. О́skenbaev, Túrkistan oblysynyń ákimi О́. Shókeev, «Samuryq-Qazyna» jyljymaıtyn múlik qory» AQ basqarma tóraǵasy B. Sandyqbaev, «Atameken» UKP basqarma tóraǵasynyń orynbasary O. Ordabaev ózderi jetekshilik etetin baǵyttar boıynsha baıandama jasady.
Sonymen qatar, keńes barysynda óńirlerdiń, Nur-Sultan, Almaty jáne Shymkent qalalarynyń basshylary sóz sóıledi.
«QR Tuńǵysh Prezıdenti – Elbasy N. Á. Nazarbaev jáne Memleket basshysy Q. K. Toqaevtyń tapsyrmasy boıynsha Arys qalasyn qalpyna keltirý maqsatynda elimizdiń barlyq óńirleri, ulttyq kompanııalary, iri bıznes ókilderi belsendi túrde atsalysty», dep A. Mamın, «bir aı ishinde aýqymdy jumystar atqarylǵanyn, qalany qalpyna keltirýge 10 myńnan astam qurylysshy qatysqanyn» aıtty.
QR Úkimetiniń basshysy Arys qalasyn qalpyna keltirýge aralasqan, kómek qolyn sozǵan barlyq otandastarǵa, bıznes, ákimdik ókilderine, qurylysshylarǵa alǵys bildirdi.
Keńesti qorytyndylaı kele, QR Premer-Mınıstri jalpy qaladaǵy negizgi qurylys jumystary aıaqtalǵanyn atap ótip, tıisti mınıstrlikter men vedomstvolarǵa birqatar naqty tapsyrmalar berdi.
Qazirgi tańda zardap shekken 7516 bir qabatty jeke úılerdiń 6611-i nemese 90% jóndeýden ótkizildi. Qalǵan 905 bir qabatty jeke úılerdi jóndeý jumystaryn 10 tamyzǵa deıin aıaqtaý qajet. 67 kóp qabatty úılerdi qalpyna keltirý boıynsha jumystardy 20 tamyzǵa deıin aıaqtaý kerek. Barlyq 66 áleýmettik nysandy qalpyna keltirý jumystaryn 20 tamyzǵa deıin bitirý qajet. Osyǵan oraı, Shtabtardyń jumysy 20 tamyzǵa deıin jalǵasady.
О́ńirler bekitiligen sektorlaryndaǵy nysandardy qalpyna keltirý jumystaryn atalǵan merzim ishinde tolyǵymen aıaqtaýdy qamtamasyz etýi tıis.
Ásirese, Nur-Sultan qalasy jáne Almaty oblysy bekitilgen sektorlarynda jumys qarqynyn kúsheıtip, qurylys barysyn qatań baqylaýǵa alýy qajet.
Túrkistan oblysynyń ákimi Eńbek jáne halyqty áleýmettik qorǵaý mınıstrligimen birlesip, Arys qalasynyń jáne qala mańyndaǵy eldi mekender turǵyndaryna bir rettik ótemaqy tóleý jumystaryn tolyǵymen aıaqtaýy tıis.
Indýstrııa jáne ınfraqurylymdyq damý mınıstrligi «Atameken» Ulttyq kásipkerlik palatasymen birlesip, qalanyń barlyq kommersııalyq nysandaryn qalpyna keltirý jumystaryn aıaqtaýy kerek.
Qorǵanys mınıstrligi bekitilgen Jol kartasy boıynsha qoımalardaǵy qarý-jaraqtardy shyǵarýdy júıeli túrde qamtamasyz etip, Túrkistan oblysynyń ákimdigimen birlesip áskerı qalashyqtaǵy áskerge qatysy joq 58 otbasynyń máselesin pysyqtaýy tıis.
A. Mamın Arys qalasynyń turaqty tynys-tirshiligin qamtamasyz etý úshin barlyq kúsh-jigerdi jumyldyrýdyń qajettigin aıtyp, «Úkimet Elbasy men Memleket basshysynyń tapsyrmasy boıynsha Arys qalasynyń odan ári damý máselelerin baqylaýda ustaıtynyn» atap ótti.