«Shubarkól kómir» AQ-nyń kenshileri razrezdiń negizi qalanǵannan beri 170 mln tonna kómir óndirip, rekordtyq kórsetkishke qol jetkizdi. Aıtýly mejeni «Sentralnyı» razrezindegi quramynda mashınıst Ahmadııa Ahmetov pen onyń kómekshisi Nıkolaı Zatonnyı bar «EKG-5» ekskavator brıgadasy alǵashqy bolyp baǵyndyrdy.
Kásiporyn kenshileri bul rekordtyq kórsetkishti Eýrazııalyq Toptyń (ERG) 25 jyldyǵyna arnady.
«Shubarkól kómir» AQ-nyń prezıdenti Andreı Safonov atalǵan óndiristik jetistikti kúlli ujymnyń josparly jáne tolyqqandy jumysynyń nátıjesi dep sanaıdy. Kásiporynnyń byltyrǵy óndiristik kórsetkishi de óte joǵary bolǵan. Mysaly, 2018 jyldyń qorytyndysy boıynsha shubarkóldik kenshiler 11 mln 600 myń tonna kómir óndirdi.
Qazirgi tańda «Shubarkól kómir» AQ ınvestısııalyq baǵdarlama aıasynda óndiris tıimdiligin arttyrýǵa qomaqty úles qosatyn taý-ken jabdyǵy parkin jańartýdy qolǵa alǵan. Mysaly, 2019 jyldyń birinshi jartysynda ǵana kásiporynnyń avtokólik parki 11 aýyr júk tasıtyn Caterpillar 777E kóligimen jáne 18 dana qosalqy tehnıkamen tolyqty. Onyń ishinde mobıldi avtosheberhanalar, avtogıdrokótergishter, sý tasyǵysh, vahtalyq avtobýstar bar. Bıyl tehnıkamen qaıta qamtamasyz etý isi aıasynda paıdalaný merzimi aıaqtalǵan eki «EKG-5A» mashınasynyń ornyna shómish kólemi 11 m3 HITACHI EX-1900 ekskavatory jumys isteı bastady. Sonymen qatar temir jol ınfraqurylymyn jańartý boıynsha da aýqymdy jumys atqarylýda.
Eske salsaq, «Shubarkól kómir» AQ – Qazaqstandaǵy joǵary kalorııaly jáne kúldiligi tómen kómir óndirýshi iri kásiporyn. О́ndiris oshaǵy, sondaı-aq koks gazynan arnaıy koks pen elektr energııasyn óndirýmen de aınalysady.
Qaraǵandy oblysy