«Nevada-Semeı» halyqaralyq antııadrolyq qozǵalysynyń belsendisi, qos qoly bolmaǵandyqtan sýretti tisimen salatyn qylqalam sheberi Káripbek Kúıikovtiń jeke galereıasy jańa kartınamen tolyqty.
Keneptegi boıaýy keppegen týyndysynda sýretshi Temirtaý qalasyndaǵy metallýrgııalyq kombınattyń tútini býdaqtaǵan tórt murjasyn, satymen joǵaryǵa órmelep shyǵyp, kók aspandy tumshalaǵan qoıý qara tútinniń ústine kúnniń sýretin salyp jatqan adamdy beınelegen. Munysymen sýretshi jaryq pen túnektiń arpalysyn qylqalam tilimen aıtqysy kelgen.
Káripbek ózin keıingi kezde ekologııa máselesiniń qatty tolǵandyryp júrgenin aıtady.
– Men bul kartınamda Temirtaý qalasynyń ekologııalyq apattyń aldynda turǵanyn aıtqym kelip, dabyl qaqtym. Kúnnen-kúnge ýshyǵyp bara jatqan máseleniń aldyn almasaq, qalanyń apatty aýmaqqa aınalary sózsiz, – deıdi sýretshi.
Sonymen qatar, qoǵam belsendisin óziniń týyp-ósken jeri – Egindibulaq kentiniń qazirgi jaǵdaıy da az tolǵandyrmaıdy. Semeı ıadrolyq synaq polıgonynan 200 shaqyrym jerde ornalasqan bul eldi mekenniń bulyńǵyr bolashaǵyn oılap qatty ýaıymdaıdy eken qoǵam belsendisi.
– Kezinde Egindibulaq 35 myń adam turatyn, jaǵdaıy óte jaqsy aýdan ortalyǵy bolatyn. Qazir munda bar-joǵy 2,5 myń adam turady. Jergilikti bılik turmysty túzeımin dep joqtan bar jasaǵanymen jastar aýylǵa turaqtamaı, qalaǵa qonys aýdaryp jatyr, – dep muńaıady Káripbek.
Jaqyn kúnderi Káripbek «Nevada-Semeı» halyqaralyq antııadrolyq qozǵalysynyń 30 jyldyǵyna oraı elordada ótetin úlken sharaǵa qatyspaqshy. Sonymen qatar ol Ulybrıtanııa jerinde, atap aıtqanda London men Manchester qalalarynda ótetin óziniń jeke kórmesine barýdy da josparlap otyr.
Eske salsaq, sýretshi Káripbek Kúıikovtiń «Jarylys» atty kartınasyn Elbasy N.Nazarbaev Vashıngtonda ótken ıadrolyq qaýipsizdik sammıtinde AQSh-tyń sol kezdegi prezıdenti B.Obamaǵa syıǵa tartqan bolatyn.
Qaraǵandy oblysy