Qaraǵandy oblysy alapat apattan zardap shekken Arys qalasy turǵyndarynyń aldynda qoldan kelgen kómekten aıanyp jatqan joq. Jarylystan japa shekken aǵaıynǵa alǵashqylardyń biri bolyp gýmanıtarlyq kómek jóneltken de qaraǵandylyqtar bolatyn. Qazirgi tańda oblystan attanǵan qurylysshylar brıgadalary Arys qalasynda úı salyp, shamaly zaqym kelgen baspanalarǵa kúrdeli jóndeý júrgizip jatyr. Qaraǵandylyq qurylysshylardyń bul jumystardy sapaly oryndap jatqanyn jergilikti jurttyń BAQ arqyly, áleýmettik jeliler boıynsha aıtqanynan búkil el estip-bilip otyr.
Taıaýda oblystyń Aqtoǵaı aýdanyna Arys qalasynan 200 oqýshy bala demalýǵa keldi. Olar tabıǵaty tamyljyp turǵan Bektaýata baýraıyndaǵy «Fakel» demalys lagerine ornalastyryldy.
Arystan kelgen balaqaılardy Aqtoǵaı aýdanynyń ákimi Saltanat Ábeýova, Prıozersk qalasynyń ákimi Qaırat Qamzın bastaǵan top Saryshaǵan stansasynyń temir jol vokzaly basynan saltanatty túrde qarsy alǵan bolatyn.
Arystyń kishkentaı turǵyndary Bektaýata baýraıyndaǵy ataqty demalys oshaǵynda bir aıǵa jýyq ýaqyt tynyǵatyn bolady. Olar úshin neshe túrli qyzǵylyqty baǵdarlamalar da oılastyrylyp qoıylǵan. Mysaly, balalar taza aýada sporttyq-buqaralyq oıyndar oınap, robot tehnıkasy men qolmen modeldeý shyǵarmashylyq zerthanalarynda tanymdyq sabaqtar alatyn bolady. Sondaı-aq, olar úshin týrıstik joryqtardyń baǵdarlamasy da uıymdastyrylǵan. Lagerde balalar alty mezgil tamaq iship, qymyzdyń da dámin tatatyn bolady.
Aıta ketý kerek, buǵan deıin de Arys qalasynyń oqýshy balalary oblystyń Qarqaraly ulttyq tabıǵı parkindegi demalys bazasynda jarty aı demalǵan bolatyn. Qaraǵandy memlekettik tehnıkalyq ýnıversıtetine qarasty «Polıtehnık» demalys bazasynda tynyqqan 30 bala ekskýrsııalar men týrıstik joryqtarǵa shyǵyp, sporttyq jarystar men zııatkerlik oıyndarǵa qatysyp, jazǵy kanıkýldy mazmundy ótkizdi.