О́tken dúısenbi kúni Almaty oblysy Panfılov aýdany Taldy aýyldyq okrýginiń aýmaǵyndaǵy taýly jerlerde dala órtin sóndirý kezinde 3 adam qaza tapty. Onyń bireýi Jarkent orman sharýashylyǵy mekemesiniń qyzmetkeri, qalǵan ekeýi – órtti óz kúshterimen sóndirýge tyrysqan jergilikti turǵyndar.
Ishki ister mınıstrligi baspasóz qyzmetiniń habarlaýynsha, órtti sóndirý kezinde sonymen qatar 7 adam túrli dárejedegi kúıik alǵan, onyń ishinde 1 adam aıaǵyn syndyryp alypty. Zardap shekkender Lesnov aýylyna tikushaqpen jetkizilip, odan ári Jarkent qalasynyń ortalyq aýdandyq aýrýhanasyna jetkizýdiń qamy jasalǵan.
Oqıǵa ornynda Almaty oblysynyń TJD men Polısııa departamentiniń jeke quramynan 59 adam, 13-ten astam arnaıy tehnıka, sondaı-aq Jarkent memlekettik orman mekemesiniń qyzmetkerleri jumys isteýde.
О́rt oshaǵyn sóndirýge órt sóndirýshiler jáne polısııa qyzmetkerlerimen birge jergilikti turǵyndar, sondaı-aq orman sharýashylyǵy qyzmetkerlerinen qurylǵan órtke qarsy erikti qurylymdar jumyldyryldy.
Taýly jerdegi órtti sóndirý qıyndyq týǵyzýyna baılanysty sýaǵar qurylǵysy bar MI-8 tikushaǵy tartylǵan. Jaqyn mańda sý alatyn aıdyn-kól bolmaǵandyqtan, áýe kemesi adamdardy tasymaldap, qorjyndy búrikkishterdi sýmen qamtamasyz etý úshin jumys isteýde.
Oǵan qosa, kúrdeli meteojaǵdaıda aınalanyń kórinýi nashar bolǵandyqtan, bar salmaq órt sóndirýshilerdiń ózderine túsip jatyr.
Qazirgi ýaqytta órtti sóndirý boıynsha jumystar jalǵasýda. О́rt oshaqtaryn oqshaýlaý úshin qosymsha kúshter men quraldar tartylǵan. Keshe oqıǵa ornyna «Qazavıaqutqarý» mekemesiniń taǵy bir tikushaǵy jiberilgen.