QR birinshi qarjy vıse-mınıstri Berik Sholpanqulov Úkimettegi baspasóz konferensııasynda Qazaqstandaǵy kóleńkeli ekonomıka deńgeıin tómendetý sharalary týraly aıtty.
B. Sholpanqulov atap ótkendeı, bıznesti «kóleńkeden» shyǵarý jumystary salyq jáne keden saıasatyn jetildirý jáne qolma-qol aqshasyz aınalymnyń úlesin arttyrý arqyly júzege asyrylyp jatyr.
«Iske asyrylyp jatqan sharalar salyqtyq jáne kedendik ákimshilendirýdi sıfrlandyrýǵa, aqparattyq júıelerdi ıntegrasııalaýǵa negizdelgen, munda aqparattyq júıelerdi damytý sekildi bastamalardy iske asyrýdan úlken nátıje kútiledi, olar: ónimdi tańbalaý, elektrondy shot-faktýralar, «Vırtýaldy qoıma» modýli, táýekelderdi basqarý júıesi, onlaın-kassalyq baqylaý mashınasyn engizý jáne t.b.», dedi B. Sholpanqulov.
Onyń aıtýynsha, taýarlardy baqylaý júıesin qurý ekonomıkany kontrafaktilik ónimderden qorǵaýǵa kómektesedi. Sonymen, «Elektrondyq shot-faktýralar» AJ túpkilikti tutynýshyǵa deıin taýarlardyń qozǵalysyn baqylaýǵa múmkindik beredi, «Vırtýaldy qoıma» modýli taýarlardyń qozǵalysyn avtomatty túrde baqylaýǵa múmkindik beredi.
«Naqty qadaǵalaý turǵysynan taýarlardy tańbalaý jumystary júrgizilip jatyr. Teri buıymdary boıynsha pılottyq jobanyń nátıjesinde 2018 jyly kirister 1,5 esege ósti. Búginde temeki men alkogol ónimderi boıynsha pılottyq joba júrgizilýde», dedi birinshi qarjy vıse-mınıstri.
Sonymen qatar, osy jyldyń 1 qańtarynan bastap shaǵyn jáne orta bızneske arnalǵan salyqtyq raqymshylyq jasaý jumystary bastaldy. 90 myńǵa jýyq salyq tóleýshige raqymshylyq jasalady. Olardyń 45%-yna raqymshylyq jasaldy. Negizgi maqsat — salyq túsimderin arttyrý.
B. Sholpanqulovtyń aıtýynsha, blokcheın tehnologııasy arqyly QQS baqylaý shotyn qoldana otyryp, QQS-ty basqarýdyń jańa ádisi engizilgen.
QQS baqylaý shotyn qoldanatyn salyq tóleýshilerge qatysty salyqtyq tekserýler QQS qaıtarylǵan kezde alynyp tastalady, QQS qaıtarý merzimi 55-ten 15 jumys kúnine deıin qysqardy.
Taýarlar qozǵalysyn baqylaýdyń sońǵy kezeńi - 2020 jylǵy 1 qańtardan bastap onlaın-kassalyq baqylaý mashınalaryn paıdalanýǵa jappaı kóshý, bul reıdtik tekserýlerden qashyqtan salyqtyq baqylaý júrgizýge kóshýge ákeledi.
Sonymen qatar EAEO aýmaǵy boıynsha taýarlar tranzıtiniń biryńǵaı júıesin qurý jumystary júrgizilip jatyr. Qyrǵyzstannan Reseı Federasııasyna Qazaqstan aýmaǵy arqyly tranzıttik taýarlardy baqylaý maqsatynda navıgasııalyq elektrondyq plombalardy paıdalaný boıynsha pılottyq joba iske qosyldy.
B. Sholpanqulovtyń aıtýynsha, kóleńkeli aınalymdy azaıtý boıynsha mınıstrliktiń negizgi mindetteriniń biri — «aınaly» kedendik statıstıkadaǵy sáıkessizdikterdi azaıtý.
Úshinshi elderden ákelinetin taýarlardyń túsimderiniń 30%-yn Qytaıdan shyqqan taýarlar quraıdy. Osyǵan baılanysty, jaqynda Mınıstrliktiń Memlekettik kirister komıteti men QHR-dyń Bas kedendik basqarmasy arasynda ózara yntymaqtastyq týraly tıisti hattamalarǵa qol qoıyldy. Usynylǵan bastamalardyń nátıjesi bıýdjetke 800 mlrd teńge kóleminde qosymsha túsimder túrinde kútiledi.
«Júrgizilip jatqan bastamalar men qabyldanyp jatqan sharalar kóleńkeli ekonomıkany azaıtýǵa, bıýdjetke salyqtyq jáne kedendik túsimderdiń ulǵaıýyna jol ashady», dep túıindedi B. Sholpanqulov.