«Botaı» memlekettik tarıhı-mádenı mýzeı-qoryǵynyń qurylǵanyna bir jyl tolýyna oraı «Botaı – soltústik dalanyń qazynasy» atty dóńgelek ústel uıymdastyryldy.
Osydan bir jyl buryn Úkimettiń qaýlysymen «Botaı» memlekettik tarıhı-mádenı mýzeı-qoryǵy» respýblıkalyq memlekettik qazynalyq kásiporny qurylǵan bolatyn. Adamdardyń ejelgi turaǵy otyryqshylyq turmys saltymen erekshelenedi. Jartylaı jer ústine turǵyzylǵan úıler aǵashtan, saz balshyqtan, jylqy súıeginen, qaıyńnyń qabyǵynan jáne shymnan salynǵan. Olardyń pishini kópburyshty, al tóbeleri kúmbez tárizdi bolǵan. Botaılyqtar qola dáýirine deıin eki myń jyl buryn mystan jasalǵan qural-saımandar men ártúrli zattardy paıdalanǵan. Alǵash ret jylqy túlegin qolǵa úıretip, qymyz ashytqan. 15 gektar jerdi alyp jatqan «Botaı» qonysynan 158 baspananyń ornyn belgili arheolog, tarıh ǵylymdarynyń doktory Vıktor Zaıbert jetekshilik etken ekspedısııa taýyp, tórtkúl dúnıege tanytqan.
«Botaı» mýzeı-qoryǵynyń aldaǵy josparlary men týrıstik salanyń damýyna qosatyn úlesin talqylaýǵa arnalǵan jıyndy Aıyrtaý aýdanynyń ákimi Beıbit Ismanov kirispe sózben ashty. Vıktor Zaıbert, Mádenıet jáne óner isteri departamenti tarıhı-mádenı mura basqarmasynyń bas sarapshysy Azamat Jolaev, L.Gýmılev atyndaǵy Eýrazııa ulttyq ýnıversıtetiniń professory, bıologııa ǵylymdarynyń doktory Murat Nuryshev, Aqmola oblystyq tarıhı-ólketaný murajaıynyń dırektory Qýanysh Shaqshaqov, taǵy basqalary ejelgi Botaı mádenıetiniń mańyzdylyǵyn, qazaq halqynyń tarıhy tereńde jatqanyn aıryqsha atap ótti. Atqa miný mádenıeti men jylqy sharýashylyǵy jer júzine Uly daladan taraǵanyna naqty mysaldar keltirdi.
V. Zaıberttiń «Botaı mádenıetiniń sakraldy konteksteri» atty jańa kitabynyń tusaýy kesildi. «Botaı» memlekettik tarıhı-mádenı mýzeı-qoryǵy» respýblıkalyq memlekettik qazynalyq kásipornynyń dırektory Ýálıhan Qulbaev atqarylǵan jumystar men aldaǵy josparlar jaıly esep berdi.
Murajaı-qoryǵynyń mádenı damýyna qosqan eleýli úlesi úshin ǵylymı-qor jumysy jáne ekskýrsııalyq qyzmet kórsetý bóliminiń jetekshisi Sabına Ámirova, ǵylymı-qor jumysy jáne ekskýrsııalyq qyzmet kórsetý bóliminiń ekskýrsııa júrgizýshisi О́mirserik Erǵalıev, nysandardy qorǵaý jáne paıdalaný bóliminiń qyz etkeri Vladımır Matıýshına Alǵys hattarmen marapattalyp, baǵaly syılyqtar tabys etildi.
Plenarlyq májilisten keıin dóńgelek ústelge qatysýshylar Nıkolskoe aýyly janyndaǵy «Botaı» arheologııalyq qazba jumystarynyń barysymen tanysyp, kórmeni tamashalady.
Soltústik Qazaqstan oblysy