Aıtýly sharada 1000 lıtrden astam qymyz saýdaǵa shyǵarylyp, ulttyq dástúr merekesine kelgen qonaqtarǵa 200 keli qazaqsha et ázirlendi.
Budan basqa qolóner jármeńkesi, karnavaldy sherý, ulttyq oıyndar uıymdastyryldy. Bal qymyz, dónen qymyz, jýas qymyz, qysyraq qymyz sekildi ulttyq sýsynnyń túrlerin satyp alýshylar kóp boldy.
Festıvaldi uıymdastyrýshylardyń biri Erlik Muhamedjanovtyń aıtýynsha, ıgi shara qazaq úshin erekshe qasıetti túlik sanalatyn, ishse-sýsyn, minse-kólik, jese-taǵam jylqynyń paıdasyn nasıhattaýdy ditteıdi . Qambar atanyń osydan bes myń jyl buryn Soltústik Qazaqstanda ornalasqan Botaı qonysynda alǵash qolǵa úıretilgendigi ǵylymı túrde dáleldengen.
Tuıaǵymen jer tarpyp, aýyzdyǵymen alysqan sáıgúlikter sherý kóshin bastap,olardyń artynan velooshabandozdar men «Qulager» hokkeı klýbynyń oıynshylary erip júrdi. Merekege jınalǵan jurtshylyq sporttyq oıyndarǵa qatysyp, kúshterin, eptilikterin synaı aldy.
«Jastardyń belsene qatysýymen óten festıval maǵan óte unady. Kóńil kúıim keremet. О́z ádet-ǵuryptaryńyz pen ulttyq qundylyqtaryńyzdy dáriptep jatqandaryńyz qýantady. Usynylǵan ulttyq taǵamdar men qymyzdyń dámi til úıiredi», deıdi Saha elinen arnaıy kelgen meıman Konstantın Stepanov.
Festıval sońynda lototronnyń kómegimen lotereıa oınatyldy. Basty utysqa tigilgen jylqy Petropavl qalasynyń turǵyny Qarataı Birjanulyna buıyrdy.
Qolónershiler, aspazdar saıysynyń jeńimpazdary da marapattarǵa ıe boldy.
Soltústik Qazaqstan oblysy