Qytaıdyń ulttyq observatorııasy kele jatqan Baılý taıfýny saldarynan qaýip-qaterdiń sary deńgeıin jarııalady. Osyǵan baılanysty Qytaıdyń ońtústiginde daýyl soǵyp, tolassyz jańbyr jaýýy múmkin dep habarlady Sınhýa agenttigi.
Bıylǵy 11-shi taıfýn Taıvannyń ońtústik-shyǵysyna senbi kúni kelýi nemese aınalyp ótýi yqtımal. Ári qaraı senbi kúni túnde nemese jeksenbi tańerteń Fýszıan men Gýandýn provınsııalarynyń jaǵalaý mańyndaǵy aýdandaryna jyljıdy dep habarlaıdy Qytaıdyń ulttyq meteorologııalyq ortalyǵy.
Ortalyq qatty jel men jaýynǵa baılanysty Taıvan, Fýszıan, Chjeszıan, Gýandýn, Shansı, Sychýan jáne Iýnnan provınsııalarynda eskertý jarııalady. Keıbir aýdandarda saǵatyna 60 mm-ge deıin jaýyn-shashyn jaýady. Sondaı-aq Qytaıdyń ulttyq meteorologııalyq ortalyǵy turǵyndardan belsendi demalystan bas tartyp, jergilikti bılikti jańbyr saldarynan bolýy múmkin sý tasqynyna qarsy saqtyq sharalaryn qoldanýǵa shaqyryp jatyr.
Qytaıda kúrdeli aýa raıy jaǵdaıy týraly halyqqa eskertý úshin tórt deńgeıli kórsetkish: qyzyl, sarǵylt, sary jáne kók tús qoldanylady.