Ishki ister mınıstri Erlan Turǵymbaev Aqmola oblysy Selınograd aýdany Qyzyljar aýylyndaǵy №1 orta mektebiniń alǵashqy qońyraý saltanatyna qatysyp, «Mınıstr saǵatyn» ótkizdi.
«100 mektep, 100 aýrýhana» memlekettik baǵdarlamasymen salynǵan Qyzyljar aýyldyq №1 orta mektebine bıyl bes jyl tolyp otyr.
Ishki ister mınıstri oqýshylarǵa jańa oqý jylynda sáttilik tiledi. Bıylǵy jyldyń Jastar jyly bolyp belgilengenine kóńil aýdarǵan mınıstr Qyzyljar aýyldyq mektebi oqýshylarynyń arasynda Parlament jáne Úkimet músheleriniń, ataqty sportshylar men kásipkerlerdiń shyǵatynyna senim bildirdi. Sóz sońynda bas polıseı ata-analar men ustazdar qaýymyna izgi tilegin jetkizdi.
Saltanatty sharadan keıin mınıstr mektep ishin aralap, ujymmen tanysty. Sodan soń aýyl turǵyndaryn qabyldap, jurtshylyqtyń ótinish-tilekterin tyńdady.
Aýyl turǵyny Márzııa Jumabaeva kóshelerdiń kópshiliginiń jaryqtandyrylmaǵanyna shaǵymdanyp, saldarynan jol-kólik apattarynyń jıi bolatynyn jetkizse, Kúntýbek Ábdildınov tártip saqshylaryna ala taıaqty qaıtarý máselesin kóterdi. Aýyl turǵynynyń aıtýynsha, qarańǵyda polısııa qyzmetkerleri toqtatqanda ala taıaqtyń joqtyǵynan júrgizýshiler tártip saqshylaryn baıqamaı qalyp jatady eken.
Sonymen qatar turǵyndar mınıstrge jeke máseleleri boıynsha da ótinish bildirdi. Sonyń biri aýyl turǵyny Alekseı Rıaboshapka bankke kepildikke qoıǵan kóligin ala almaı júrgenin jetkizdi. Aıtýynsha, kóligin bankke kepildikke qoıyp nesıe alǵan ol qazir nesıesin tolyǵymen japqanymen, Halyqqa qyzmet kórsetý ortalyqtarynyń bazasynda onyń kóligi áli banktiń menshigi bolyp turǵan kórinedi. Mınıstr máseleni dereý sheshýdi tapsyrdy. Al ańshy Vıtalıı Iаkýsevıch myltyq ıelenýge ruqsat alý jaıyn surady. Mınıstr bul máseleni qarastyrýǵa ýáde berdi.
Mektep oqýshylarynyń arasynda da mınıstrden aqyl-keńes suraýshylar boldy. Sonyń ishinde joǵary synyp oqýshylary mınıstrden ishki ister organdary men qorǵanys salasynyń oqý oryndaryna qalaı oqýǵa túsý kerektigi jaıly keńes aldy.