Parlament Senatynyń altynshy shaqyrylymdaǵy besinshi sessııanyń birinshi otyrysynda joǵary palata depýtattary jasyryn daýys berý arqyly Senat Tóraǵalyǵyna biraýyzdan Darıǵa Nazarbaeva saılandy. Bul týraly Parlament Senatynyń baspasóz qyzmeti habarlady.
«Maǵan senim bildirip qoldaý kórsetkenderińiz úshin rahmet. Bul men úshin zor mártebe jáne úlken jaýapkershilik. Qazaqstan Respýblıkasy Parlamentiniń joǵarǵy palatasynyń basshysy retinde men súıikti Otanymyzdyń gúldenýi úshin bar kúsh-jigerimdi, bilimim men tájirıbemdi jumsaımyn», - dedi D.Nazarbaeva.
Parlamenttiń joǵary palatasy Tóraǵasynyń orynbasary laýazymyna aǵymdaǵy jyldyń 13 tamyzynda Prezıdent Jarlyǵymen Parlament Senatynyń depýtattyǵyna taǵaıyndalǵan Asqar Shákirov saılandy. Senatorlar Adam jónindegi ýákil qyzmetine Elvıra Ázimovany saılady.
Sondaı-aq otyrys barysynda turaqty komıtetterdiń tóraǵalary saılandy.
Konstıtýsııalyq zańnama, sot júıesi jáne quqyq qorǵaý organdary komıtetiniń tóraǵasy laýazymyna Vladımır Volkov saılandy.
Halyqaralyq qatynastar, qorǵanys jáne qaýipsizdik komıtetiniń tóraǵasy laýazymyna Muhtar Qul-Muhammed saılandy.
Ekonomıkalyq saıasat, ınnovasııalyq damý jáne kásipkerlik komıtetiniń tóraǵasy laýazymyna Serik Jaqsybekov saılandy.
Áleýmettik-mádenı damý jáne ǵylym komıtetine Murat Baqtııaruly jetekshilik etedi.
Álı Bektaev Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń tóraǵasy boldy.
Qarjy jáne bıýdjet komıtetin Olga Perepechına basqarady.
Jaqynda Prezıdent Jarlyǵymen taǵaıyndalǵan Senat depýtattary Nurtóre Júsip, Andreı Lýkın, Dana Nurjigitova, Qanatbek Safınov jáne Lazzat Súleımen ant qabyldap, Senattyń turaqty komıtetteriniń quramyna saılandy.
Senat Tóraǵasy Qazaqstan Respýblıkasy Prezıdentiniń Jarlyǵymen ókilettikteri toqtatylǵan senatorlar - Sergeı Gromov, Birǵanym Áıtimova, Asqar Beısenbaev, Georgıı Kım, Dýlat Qusdáýletov, Rashıd Túsipbekovterge alǵys bildirip, árqaısysynyń jeke qasıetterine toqtalyp, parlamentarızmdi damytýǵa, sondaı-aq zań shyǵarý úderisin jetildirýge qosqan úlesterin atap ótti.
Eske salsaq, D.Nazarbaevanyń kandıdatýrasyn Qazaqstannyń Prezıdenti Qasym-Jomart Toqaev usyndy. Prezıdent Ákimshiliginiń basshysy Qyrymbek Kósherbaev Memleket basshysynyń atynan sóz sóıledi. «Qazaqstan Respýblıkasy Konstıtýsııasynyń 58-babyna sáıkes Qazaqstan Respýblıkasy Parlamenti Senatynyń Tóraǵasy laýazymyna Darıǵa Nursultanqyzy Nazarbaevany saılaýdy suraımyn», - delingen Prezıdenttiń sózinde.