Zarına Altynbaeva Italııany tánti etti

Ánshiniń pıar-menedjeri Dına Ydyrysovanyń habarlaýynsha, Zarına baıqaýdan jeńispen oralyp qana qoımaı, «Montecatini Opera Competition» halyqaralyq opera fes­tıvaline taǵy da bir márte qatysýǵa  jáne Italııanyń Parma Opera teatrynda jumys isteýge usynys alǵan. Halyqaralyq baıqaý tamyz aıynda Montekatını, Toskana qalalaryna ótken. Oǵan Italııa, Aýstrııa, Reseı, Japonııa, Koreıa, AQSh, Qytaı jáne basqa da memleketterden eń tańdaýly opera ánshileri qatysqan.

«Mundaı mańyzdy baıqaýǵa tolqymaı, tebirenbeı qatysý múmkin emes. Italııa bel canto repertýarynyń oryndalýyna óte qatal jáne qyzǵa­nyshpen qaraıdy. Sondyqtan shyrqal­ǵan ánniń ár sózine, árbir mýzykalyq frazaǵa, árıne Italııa mýzykasynyń oryndalý dástúrine asa mán berip, qatań saqtaýǵa tyrystym», deıdi Zarına Altynbaeva.

Baıqaý úsh týrdan turǵan, oǵan 90-nan asa oryndaýshy qatysyp, 15-i ǵana márege jetken. Baıqaý talaby boıynsha  ánshige eki arııany ıtalıan tilinde oryndaý mindettelgen. Márege jetken ánshiler Terme Tettuccio sahnasynda Bolonı qalasynyń sımfonııalyq orkestriniń súıemeldeýimen óner kórsetken.

Baıqaýǵa qatysýshylardyń óne­rin Máskeý akademııalyq mýzyka teatry­nyń kórkemdik jetekshisi ári bas dırıjeri, Reseıge eńbegi sińgen ártis Felıks Korobov, Montekatını Terme opera festıvaliniń kórkemdik jetekshisi, pıanıst Marııa Djýlııa Grassını, Parma OperArt kórkemdik jetekshisi Eddı Lovlıo (Italııa), Easter Festival Salzburg kórkemdik keńesshisi Djozef Gassek (Aýstrııa), N.Jıganov atyndaǵy Qazan memleket­tik konservatorııasynyń rektory Rýbına Abdýllına (Reseı), Ivan Kozlovskıı atyndaǵy art-ortalyq­tyń kórkemdik jetekshisi, rejısser Tatıana Zozýlıa (Ýkraına), Magnıtogorsk memlekettik opera jáne balet teatrynyń dırektory Ilıa Kojevnıkov (Reseı), Kıtakıýsıý Sıtı Opera teatrynyń barıtony Gvıdo Hassý sekildi halyqaralyq bedeldi  qazylar alqasy baǵalady.

Sonymen baıqaýdyń birinshi júldesin barıton Aleksandr Chırıak (Rýmynııa), ekinshi oryn qazaqstandyq soprano Zarına Altynbaeva ıelense, al úshinshi oryndy aýstrııalyq barıton Maıkl Fısher men reseılik messo-soprano Natalıa Zımına bólisti.

Montecatini Opera Festival – tehnı­kalyq daıarlyǵy myqty, endi halyqaralyq sahnalardy baǵyn­dy­rýdy murat tutqan álemniń jas oryndaýshylary úshin taptyrmas múmkindik alańy. Qazaqstannyń atynan qatysqan Zarına Altynbaeva – birneshe halyqaralyq baıqaýlarda laýreat atanǵan Abaı atyndaǵy opera jáne balet teatryndaǵy jetekshi ánshilerdiń biri. Ol byltyr Japonııada ótken «Tokyo Music Competition» halyqaralyq baıqaýynyń 1-orny men kórermender kózaıymy júlde­sin ıelenip qaıtqan bolatyn. Son­daı-aq 2017 jyly Almatyda ótken halyqaralyq qysqy Ýnıversıadanyń ashylý saltanatynda Dımash Qudaıbergenovpen birge án shyrqady. Azııadaǵy eń tanymal «Star of Asia» júldesiniń ıegeri jáne «Jyl adamy».

ALMATY