AQSh-tyń segiz myńǵa jýyq áskeri amerıkalyqtarǵa «Dorıan» daýylynyń aldyn alýǵa kómektesedi. Bul týraly Pentagon habarlady.
Atap aıtqanda, ulttyq gvardııanyń bes myń áskerı qyzmetkeri jáne Qorǵanys mınıstrliginiń 2,7 myń belsendi áskerı qyzmetshisi jumyldyryldy jáne kútý rejıminde tur.
Daýyldyń saldaryn joıý úshin jedel áreket etýdiń 26 bazasy qurylǵan. Alabamada 40-tan astam tikushaq ekıpajdary daıyndyq ústinde, al S-130 ushaǵy Djordjııadaǵy izdestirý-qutqarý jumystaryna qatysýǵa daıyn. Ár túrli kólemdegi jaǵalaý kúzet kemeleri jáne 80-nen astam djıpter de qatysady.
1 qyrkúıek «Dorıan» daýylynyń qaýiptilik deńgeıi sırek kezdesetin besinshi kategorııaǵa jetti. AQSh-tyń birqatar shtattarynda tótenshe jaǵdaı jarııalandy. Daýyldyń qaýpi jeldiń kúshinde ǵana emes, sonymen qatar sý tasqynyna ákelýi múmkin jaýyn-shashyn mólsherinde de bar. Sondyqtan jeldiń odan ári álsireýine qaramastan, daýyl qurlyqqa ený qaýpi bar. Ázirge boljam boıynsha, «Dorıan» AQSh-tyń Atlant jaǵalaýy boıymen júre beredi, biraq beısenbi men jumada Soltústik jáne Ońtústik Karolına shtattarynda qatty jańbyr men sý tasqyny bolýy múmkin.
Jeksenbide Bagam aralynda daýyl boldy. Premer-mınıstr Gýbert Mınnıstiń málimetinshe, Bagam aralynda daýyl saldarynan bes adam qaza tapty. Sondaı-aq, daýyl Bagam araldarynyń soltústik bóliginde ornalasqan Abako aralynyń ınfraqurylymyna úlken zalal keltirdi. Halyqaralyq Qyzyl Krest jáne Qyzyl Jarty Aı qoǵamdarynyń federasııasy (IFRC) Bagam araldarynda 13000 úı qıraǵan nemese búlingen dep habarlady.