Nur-Sultanda kún saıyn túrli baǵyttaǵy qyzyqty sharalar ótip jatady. Aldaǵy demalysta qala turǵyndary men qonaqtary tarıhı kórme, klassıkalyq mýzyka keshi men «Astana Marafon 2019» halyqaralyq marafonyna qatysa alady, dep habarlaıdy elorda ákimdiginiń resmı saıty.
QR QK Ulttyq áskerı-patrıottyq mýzeıinde «1939 jyl. Ekinshi dúnıejúzilik soǵystyń bastalýy» tarıhı-dokýmentaldyq kórmesin tamashalaı alady. Ekspozısııa RF Qazaqstandaǵy elshiligi men Nur-Sultandaǵy Reseı ǵylym jáne mádenıet ortalyǵymen usynyldy. Kórmege kelýshiler Ekinshi dúnıejúzilik soǵystyń bastalýy týraly syr shertetin oqıǵalar, KSRO-nyń qatysýymen antıgıtlerlik koalısııanyń sátsiz tustary týraly baıandaıtyn qujattar men sýretterdi kóre alady. Ekspozısııa 1938 jyldyń 29 qyrkúıeginen 1939 jyldyń 1 qyrkúıegine deıingi aralyqtaǵy Mıýnhen kelisimi kezeńin qamtıdy. Kórme saǵat 11.00-den 20.00-ge deıin 30 qyrkúıekke deıin isteıdi. Kirý tegin.
7 qyrkúıekte «Astana operanyń» kameralyq zalynda Qazaqstanda týyp-ósken amerıkalyq dırıjer jáne pıanıst, QR Eńbek sińirgen qaıratkeri Temirjan Erjanovtyń alǵashqy fortepıanolyq jeke konserti ótedi. Baǵdarlamada Mosarttyń «Fantazııa», Shýmannyń «Karnaval», E. Grıganyń «Iz vremen Holberga», Shopenniń «Ballada № 4» shyǵarmalary oryndalady. Konserttiń bastalýy 18.00-de, bılet baǵasy - 500 teńge.
Kelesi kúni «Astana opera» teatrynyń jetekshi solısi, Qazaqstannyń eńbek sińirgen ártisi Jannat Baqtaı shaqyrady. Kórermender Dj.Rossını, J.Offenbah, J.Massne, I.Shtraýs, F.Legar, E.Kýrtıs, K.Djenkıns, A.Ádbinurov jáne t.b. kompozıtorlardyń shyǵarmalaryn, halyq ánderi men klassıkalyq opera shedevrlerin, arııalar, dýetter men trıolardy tyńdaı alady. Kesh barysynda sahnaǵa «Jańa opera» máskeý teatrynyń solısi Iаroslav Abaımov, Qazaqstannyń eńbek sińirgen qaıratkerleri Medet Chotabaev pen Súndet Baıǵojın jáne Azamat Jaltyrkózov óner kórsetedi. Konsert 8 qyrkúıekte saǵat 18.00-de «Astana Opera» teatrynda ótedi. Bılet baǵasy - 500 teńgeden bastalady.
Osy kúni «Jastar» saraıynyń jazǵy sahnasynda dástúrge aınalǵan «Ashyq esik kúni» ótedi. Konserttik-saýyqtyq baǵdarlamada «Rovesnık» estradalyq bı ansambli, «Voskresene» sporttyq bı klýby, «AstCityBallet» zamanýı balet mektebi, «Radýga» ujymy, «Vremıa» teatry, «M-Art» teatr stýdııasy, «Jas-Art» estradalyq vokal teatry, «Sound Gold» zamanýı vokal stýdııasy jáne t.b. shyǵarmashylyq ujymdar óner kórsetedi dep josparlanǵan. Shara kezinde balalardy «Jastar» saraıynyń kez kelgen seksııasyna tegin jazýǵa bolady. Ashyq esik kúni 8 qyrkúıekte saǵat 13.00-de bastalady.
Elordalyqtar kútip júrgen eleýli oqıǵanyń biri «Astana Marathon 2019» halyqaralyq marafony bolady desek qatelespeımiz. Uıymdastyrýshylar eki qashyqtyq – 42,2 km (qatysý 18 jastap bastap) jáne 10 km (16 jastan bastap) daıyndap qoıdy.
Júgirý tańǵy 07.00-de bastalyp, 13.00-de aıaqtalady. Jarys máresi EKSPO kórme keshenine qarama-qarsy Rysqulov pen Túrkistan kósheleriniń qıylysyndaǵy P-5 turaǵynda ornalasqan. Onyń baǵdary Beıbitshilik jáne kelisim saraıy, Áziret Sultan meshiti, Báıterek, Nazarbaev ýnıversıteti, Astana arena sııaqty qalanyń negizgi aıshyqty jerleri kórinetindeı etip oılastyrylǵan. Ár 5-shi shaqyrymdyq belgide uıymdastyrýshylar sý men banan berip, 42,2 km júgiretin jelaıaqtarǵa ızotonıkalyq sýsyndar usynatyn bolady.
Aıta keteıik, «Astana Marathon 2019» qatysý úshin eshqandaı medısınalyq anyqtama nemese sertıfıkattyń qajeti joq.