«Kazakh Tourism» ulttyq kompanııasy bıyl ekinshi ret Mádenıet jáne sport mınıstrliginiń qoldaýymen «National Tourism Awards 2019» ulttyq baıqaýyn uıymdastyryp jatyr. Konkýrsqa ótinimder 1 qazannan bastap qabyldanady.
«National Tourism Awards 2019» ulttyq baıqaýynyń basty maqsaty – ishki jáne syrtqy týrızmdi damytý jáne tanymal etý. Sondaı-aq týrıstik sala boıynsha úzdikterdi anyqtap, qonaqjaılylyq ındýstrııasynda qyzmet kórsetý sapasyn arttyrý, deıdi «Kazakh Tourism» AQ basqarma tóraǵasynyń orynbasary Tımýr Dúısenǵalıev.
«Bul baıqaý bıznesti óz ınfraqurylymyn jaqsartýǵa, básekege qabiletti bolýǵa yntalandyrýdy kózdeıdi. Baıqaýdyń 10 atalymynda bıznestiń barlyq salalary qamtylǵan. Onda jaıǵastyrý oryndary, týrıstik operatorlar, blogerler jáne bıyl «Úzdik týrıstik joba» atalymyn qostyq. Bul qandaı da bir erekshe qonaqúı bolýy múmkin nemese etnoaýyl nemese is-shara. Mınıstrlik bul jobaǵa qarajat bóledi», dedi T.Dúısenǵalıev.
Onyń aıtýynsha, mınıstrlik (Mádenıet jáne sport mınıstrligi – red.) osylaısha jaqsy jobasy bar, biraq qarjylandyrý jetispeıtin bızneske qol ushyn sozǵysy keledi. Mundaı júldeler týrızm salasyndaǵy kóshbasshylardy anyqtaýǵa múmkindik beredi.
Baıqaýǵa qatysýshylar «Jyldyń úzdik týrıstik kompanııasy», «Úzdik gıd-ekskýrsovod», «5* sanatyndaǵy úzdik qonaqúı», «4* sanatyndaǵy úzdik qonaqúı», «3* sanatyndaǵy úzdik qonaqúı», «Úzdik shıpajaı», «Balalar men jasóspirimder týrızmi boıynsha úzdik joba», «Týrızmdi nasıhattaý boıynsha úzdik joba», «Týrızm týraly úzdik blog» jáne «Oqıǵalyq týrızm boıynsha úzdik joba» atalymdary boıynsha úmitker atana alady.
Sondaı-aq Týrızmdi damytý departamentiniń dırektory Gaýhar Jeńisbek bıyl uıymdastyrýshylar men seriktesterdiń arnaıy júldeleri de kóbeıgenin atap ótti. «Qazaqstandaǵy týrızmdi damytýǵa qosqan úlesi úshin», «Úzdik bıznes-joba» jáne «Qolónerdi damytýǵa qosqan úlesi úshin» atalymdarynyń jeńimpazdary ózderiniń startaptaryn damytýǵa grant jeńip ala alady.
«National Tourism Awards 2019» baıqaýyna ótinimder 1-31 qazan aralyǵynda www.tourismawards saıtynda qabyldanady. Irikteý jáne onlaın daýys berý nátıjesi boıynsha sarapshy qazylar alqasy jeńimpazdardy anyqtaıdy. Al jeńimpazdardy marapattaý rásimi 7 jeltoqsanda Nur-Sultan qalasynda ótedi.