Arqada shertpe kúı óneriniń ózindik mektebin qalyptastyrǵan Qyzdarbek kúıshiniń shákirti Begimsal Orynbekulynyń qalaq dombyrasy Kıikti aýylynda turatyn Muratjan Qońqyshevtiń qolynda saqtaýly.
Jazýshy, ólketanýshy Kámel Júnistegi Arqa kúı óneriniń sońǵy mogıkandarynyń biri Begimsal Orynbekulyn ótken ǵasyrdyń 50-shi jyldarynyń ishinde alǵash kórgenin, sol bir otyrysta kúıshiniń júz shaqty kúı tartqanyn aıtady. «Amal neshik, ol kezde taspaǵa jazyp alatyn múmkindik bolmap edi», dep san soǵady ótkendi esine alyp jazýshy.
Keıin mólshermen 10 jyldaı ýaqyttan keıin Begimsal kúıshini qaıta izdep barǵan Kámel Júnistegi shertpe kúı sheberiniń oryndaýyndaǵy shamamen 10-ǵa tarta kúıdi magnıtofon taspasyna jazyp alǵanyn jáne ol muranyń qazir óziniń jeke qorynda saqtaýly turǵanyn aıtady.
Ataqty kúıshi Ábiken Hasenov Begimsaldyń ónerin aıryqsha baǵalaǵan eken. Kúıshini ózimen birge Almatyǵa alyp ta ketpek bolǵan kórinedi. Alaıda kúıbeń tirlik etekten tartyp, asqan daryn ıesi aýylda qalyp qoıǵan. Aıta ketý kerek, Qyzdarbek, Ábiken Hasenov, Begimsal, qazaqtyń klassık kompozıtory Sydyq Muhamedjanov bári bir atanyń balalary.
– Kúıshi ákemizdiń balalary Qaraǵandyǵa kóship ketti de, dombyra meniń qolymda qaldy. Aspapty sheber qoldardyń jasaǵanyna daý joq, áli kúnge deıin synyn buzbaǵan. Usaq maldyń isheginen jasalǵan shekteri bolatyn, qazir ol joq, shirip túsip qalǵan, – deıdi Muratjan.
Kúıshiniń kıeli dombyrasyn kóziniń qarashyǵyndaı saqtap kele jatqan Muratjan Ábdikenuly uzaq jyldardan beri temir jol salasynda jumys isteıdi. Onyń úlken ákesi Qońqysh degen kisi Begimsal kúıshimen bir týysady.
Qaraǵandy oblysy,Shet aýdany,Kıikti aýyly