Fýtboldan Qazaqstan ulttyq quramasy 2020 jylǵy Eýropa chempıonatynyń irikteý kezeńindegi kezekti oıynyn ótkizdi. Syrt alańda Reseı quramasymen kezdesken jerlesterimiz sońǵy mınýtta óz qaqpasyna gol ótkizip alyp, 0:1 esebimen jeńilip qaldy. Sóıtip, sońǵy mınýt sındromy taǵy da qaıtalandy. Degenmen, Qazaqstan quramasynyń keshegi oıyny jankúıerlerdiń kóńilinen shyqty.
Eýro-2020 týrnıri aıasyndaǵy Reseı men Qazaqstan match aldynda fýtbol mamandary qos qurama arasyndaǵy alǵashqy oıyndaǵy nátıjeni eskerip jáne reseılikterdiń sońǵy oıyndaǵy kórsetkishterine qarap, bul joly da Reseı quramasy Qazaqstandy qalpaqpen uryp alady dep boljaǵan bolatyn. Alaıda Mıhal Bılek shákirtteri mamandardyń sáýegeıligin joqqa shyǵaryp, ońaılyqpen berilmeıtinin ańǵartty. Bas bapker Mıhal Bılek Reseıge qarsy jas ári tyń fýtbolshylardy birinshi mınýttan bastap alańǵa shyǵardy.
Jalpy, chehııalyq maman sońǵy eki oıynnan beri shabýylǵa qaraǵanda, qorǵanysqa kóp kóńil bólip keledi. Kıpr jáne Reseı quramasyna qarsy ótken oıynda alańǵa bes qorǵaýshyny shyǵardy. Sondyqtan Qazaqstan quramasy ádettegideı qorǵanysqa kóbirek kóńil bólip, qarymta shabýylǵa ıek artty. Jalpy, bas bapkerdiń kóksegeni de teń oıyn bolatyn. Biraq bul oıy júzege aspaı qaldy. Match boıy úzdiksiz shabýyldaǵan Reseı fýtbolshylary tek oıynnyń 89-mınýtynda ǵana Qazaqstan quramasynyń qaqpasynan sańylaý tapty. Aleksandr Golovınniń sol qaptaldan kótergen dobyna birinshi bolyp jetken reseılik fýtbolshy Marıo Fernandes baspen gol soǵyp ketti. Qaqpashy Nepogodov doptyń baǵytyn tapqanymen, qaqpany goldan aman saqtap qala almady. Osylaısha Reseı quramasy óz alańynda 1:0 esebimen áreń jeńiske jetti.
Matchtan keıingi baspasóz máslıhatynda Qazaqstan quramasynyń bas bapkeri Mıhal Bılek keshegi oıynda bir upaı alýymyz kerek edi dedi. Sondaı-aq ol ulttyq quramada alǵashqy oıynyn ótkizgen jas fýtbolshy Aıbol Ábikenniń ónerin joǵary baǵalady. «Qarsylastyń deńgeıin aldyn ala uǵynyp, kóp qorǵanýǵa týra keletinin túsindik. Sol sebepti qorǵanys júıesin túzýge kúsh jumsadyq. Jospar boıynsha oınadyq, sol sebepti bizdiń qaqpanyń aldynda qaýipti sátter bolmady. Bir standarttan ǵana jeńilip qaldyq. Oıynshylar sońyna deıin kúresken edi. Bir upaıǵa laıyq bolatyn. О́tken oıynda kóp kúsh sarqydyq. Sol sebepti ózgeristerge júginýge týra keldi. Negizgi quramda shyqqan oıynshylardyń barlyǵy jaqsy oınady. Aıbol Ábiken ulttyq quramadaǵy alǵashqy oıynyn myqty qarsylasqa qarsy laıyqty ótkizdi. Qalǵan jigitter de jarap tur», dedi bas bapker.
Endi Qazaqstan quramasy 10 qazan kúni «Astana Arenada» Kıpr quramasyn qabyldaıdy.