Bul týraly oblystyq polısııa departamentiniń baspasóz qyzmeti habarlady. Volonterler polısııaǵa kóshelerdi patrýldeýge, joǵalǵan adamdardy izdeýge, sondaı-aq aldyn alý jumystaryn júrgizýge kómektesetin bolady. Qostanaı qalasy polısııa basqarmasynyń «Naberejnyı» beketinde 10 eriktige arnaıy keýdesheler men kýálikter tapsyryldy.
«Polısııa volonteri» atynyń taǵy bir artyqshylyǵy – keleshekte jumysqa ornalasýǵa oń septigin tıgizedi» dedi Qostanaı oblysy polısııa departamenti kadr saıasaty basqarmasynyń bastyǵy, polkovnık Baǵdat Itesov.
«Polısııa volonteri» degen jazýy bar kýálik pen arnaıy keýdeshelerdi jergilikti polısııa qyzmetiniń bastyǵy podpolkovnık Qurmet Májikenov tabys etti.
«Búgin polısııa salasynda 500-den astam adam erikti túrde kómek kórsetedi. Olar jyl basynan beri olar 12 qylmys pen 400 ákimshilik quqyq buzýshylyqty anyqtady. Qoǵamdyq tártipti saqtaýǵa belsene qatysqany úshin 110 polısııa kómekshisi marapattaldy» dedi Qurmet Májikenov.
Polısııa eriktisi Saltanat Aımurzına da kýáligin alǵandardyń arasynda boldy. Ol eki jyl boıy «DOS» izdestirý jasaǵynyń quramynda belsendi jumys istep keledi.
«Men muny azamattyq paryzym dep sanaımyn. Bizdiń otrıad joǵalǵan adamdardy izdeýdegi is-sharalaryn belsendi júrgizedi, sondaı-aq muqtajdarǵa kómektesedi. «Polısııa volonteri» atyn odan ári jumysqa ornalasýǵa múmkindik beredi, óıtkeni biz osy mamandyqtyń qyr-syryn qazirdiń ózinde meńgerip úlgerdik» deıdi ol.
Eriktiler qozǵalysynyń mańyzdylyǵy jaıynda Memleket basshysy Qasym-Jomart Toqaev erekshe atap ótken bolatyn. Aldaǵy jyl elimizde eriktiler jyly bolyp jarııalandy.
Qostanaı