Qylyshyn súıretken qys ta ıek astyna kelip qaldy. Aqtóbe oblysynyń jylý berý maýsymyna ázirligi oıdaǵydaı deýge bolady. Oblys ákimdigi tarapynan burnaǵy jylý berý maýsymynda bolǵan kemshilikter qaperge alynyp, bıyl ondaı olqylyqtarǵa jol bermeý jaǵy eskerildi.
Jaqynda óńir basshysy Ońdasyn Orazalınniń tóraǵalyǵymen oblystyq tótenshe jaǵdaılardyń aldyn-alý jáne joıý jónindegi komıssııa otyrysy ótti. Qysqa daıyndyq barysy negizgi taqyryp bolǵan jıynǵa oblys ákiminiń orynbasarlary, óńirlik departamentter men basqarmalardyń basshylary, óńirdi qýat kózimen qamtıtyn basty mekemelerdiń biri «Energosıstema» JShS-nyń ókilderi, «QazTransGazAımaq» AО́F, «Qazaqstan temir joly» UK «Magıstraldyq jeliniń Aqtóbe bólimshesi» AQ fılıalynyń ókilderi qatysty. Beınebaılanys rejiminde qosylǵan aýdan ákimderi de mańyzdy jıynnan tys qalǵan joq.
Aqtóbe oblysy boıynsha 2019-2020 jyldardaǵy jylytý maýsymyna daıyndyq barysy týraly Energetıka jáne turǵyn-úı kommýnaldyq sharýashylyǵy basqarmasy basshysynyń mindetin atqarýshy Qarjaýbaı Ybraıymuly baıandady.
– Jylytý maýsymyna qazandyqtar, 274,5 shaqyrym jylý jelileri 100% jóndeýden ótti. Búgingi tańda jylytý maýsymynyń úzdiksiz ótýi úshin áleýmettik salalarǵa 33 237,1 tonna kómir men 1 750 tonna suıyq otyn jetkizilgen. Jylý aldymen áleýmettik mańyzy bar mekemelerge beriledi, – dedi ol. Qarjaýbaı Ybraıymulynyń aıtýynsha, qazan aıynyń alǵashqy kúninen bastap oblystaǵy áleýmettik nysandarǵa jylý berile bastaıdy.
Jalpy, kóktem kelip, kún jylynǵanǵa deıin jekemenshik úılerde turatyn jergilikti halyqqa 37 myń tonna kómir qajet eken. Qazir 88 vagon nemese 6 160 tonna kómir jetkizilgen. Sonymen qatar apta saıyn 500-700 tonna kóleminde qatty otyn úzdiksiz tasylyp, satylyp jatyr. Oblys turǵyndary úshin kómir otyny Shubarkól, Maıkóben, Ekibastuz, Qarajyra kómir alaptarynan jetkiziletinin aıta keteıik. Halyq sapaly kómirdiń tonnasyn 15 200-16 500 teńge aralyǵyndaǵy baǵa boıynsha alýda. Kúndelikti satý kólemi 40-50 tonna bolyp otyr.
Oblys ákimi jylý maýsymyna ázirlik barysyn tikeleı baqylap otyr.
– 15 qazanǵa deıin jylytý maýsymyna daıyndyqty tolyq aıaqtaý qajet. Aýdan ákimderi jergilikti kómir tasýshy kompanııalarmen jumys isteýi tıis. Qajetti otyndy ýaqtyly tasymaldaýdy bastap, turǵyndarǵa qaýipsizdiktiń aldyn alý boıynsha túsindirý jumystary tıisti deńgeıde júrgizilýi kerek, – dedi oblys ákimi.
Sondaı-aq jıynda qosymsha órt sóndirý beketterin salý, ónerkásip nysandarynyń tehnologııalyq jabdyqtarynyń jaǵdaıy, eskirgen jabdyqtardy almastyrý jáne jańartý týraly máseleler qaraldy. Ońdasyn Orazalın jylytý maýsymyna qatysty orynbasary Rahat Sydyqovqa aýdan ákimderimen birige kóterilgen máselelerdi júıeli túrde sheshýdi tapsyrdy.