Jaratqan ıe syılaǵan talantymen tanylǵan jan edi. Túbin qýyp kelgende naǵashy. Bul dúnıedegi tatar dámi taýsylyp, qaıtpas saparǵa attanǵan. Janazaǵa qaraqurym halyq jınaldy. Ishi atshaptyrym, keń meıramhana. Otyzdan asa dastarqan. Ádettegideı quran oqylyp, duǵa baǵyshtaldy.
Sál ǵana tynyshtyq ornaǵan. Kenet orta tus qasqyr kórgen qoıdaı dúr ete qaldy. Daryldaı kúlgen áýleki top qaıda otyrǵanyn qapelimde qaperinen shyǵarǵan sııaqty. О́zderi sabyr saqtap, tynyshtalar degenbiz. Bolmady. Beıtarap áńgimege taǵy eki-úsh dastarqan qosyldy. Qutty janazada emes, toıda otyrǵandaı toqmeıil, qaǵanaǵy qaryq, saǵanaǵy saryq. Jaǵa jaılaýǵa ketken. Sodan soń amalsyz ornymyzdan turyp búgingi jıynnyń qaraly jıyn ekendigin, qaıǵydan qabyrǵasy qaýsap otyrǵan et jaqyn týystarynyń kóńiline qaraý, áli topyraǵy sýyı qoımaǵan arysymyzdyń arýaǵyn syılaý qajettigin aıtqan boldyq. Biraq qulaq asar kisi kórinbeıdi. Birinen soń biri bul jıynǵa qatysy joq áldebir qyzyqty áńgimeniń kórigin qaıta-qaıta qyzdyryp, támam jurttyń nazaryn ersi qylyqtarymen ózderine aýdaryp otyr.
Qazirgi kúni basqa jerdi qaıdam, Kókshetaý óńirinde janazaǵa kóp kisi jınalady. Jastary jer ortasynan asqan úlkender turmaq, jastardyń qarasy kóp. Balalardyń synyptastary, eńbek ujymy, jora-joldas pen kóztanys. Budan on-on bes jyl buryn dál mundaı adam jınalmaıtyn. Bálkim sońǵy saparǵa shyǵaryp salýshylardyń qarasy kóp bolǵany da durys shyǵar. Biraq izet saqtap, shyn máninde jany aýyrǵan bolsa. Áıtpese «basy aýyrmaǵannyń qudaımen isi joq» degendeı, qaıǵyǵa kúlki aralassa qanyń basyńa shabady eken. Osy arada Kókshetaý qalalyq ardagerler keńesiniń tóraǵasy Shııap qajy Álıevtiń aıtqan usynysy oryndy ma dep oılaımyz.
– Búgingideı zamanda myńdaǵan adamǵa as berýdiń qanshalyqty qajeti bar? – deıdi ol, – máselen, eger máıitti osy oblys ortalyǵynda jerlesek, qalanyń halqy túski asyn óz úılerine baryp ishpeı me? Alystan at arytyp jetken aǵaıynǵa, quda-qudaǵıǵa qonaqasy berse jetkilikti ǵoı. Máselen, jasyratyn eshteńesi joq, bes myń teńgemen bata jasaımyz da, álgi qaraly úıdiń dastarqanyna qaıtqan kúngi janazaǵa, úshine, jetisine, qyrqy, jyldyq asy degen tárizdi bes ret baramyz. Onyń ústine apta saıyn beriletin jumalyqtary bar. Sonda bizdiń jasaǵan batamyzdan ne qaıyr?!
Ras-aý tipti...
Aqmola oblysy