Ádilet mınıstrliginiń delegasııasy Jeneva qalasynda 30 qyrkúıek pen 9 qazan aralyǵynda ótip jatqan Dúnıejúzilik zııatkerlik menshik uıymy (DZMU) Bas Assambleıasynyń 59-sessııasyna qatysty. Bul týraly vedomstvanyń baspasóz qyzmeti habarlady.
Bas Assambleıanyń sessııalary DZMU-da jyl saıyn ótetin basty oqıǵalardyń biri, oǵan uıymnyń 192 qatysýshy-memleketiniń ókilderi qatysady.
Bas Assambleıanyń ashylý saltanatynda Ádilet mınıstri Marat Beketaev Qazaqstan Respýblıkasy atynan zııatkerlik menshik salasyndaǵy negizgi jetistikter týraly baıandama jasady.
Qazaqstandyq delegasııa DZMU Bas dırektory Frensıs Garrımen, onyń orynbasary Sılvı Forben, UZMI-dyń ókilderimen, sondaı-aq Germanııa, Sıngapýr, Fransııa, QHR jáne AQSh-tyń delegasııa basshylarymen ekijaqty kezdesýler ótkizdi.
Kezdesý barysynda elimizdiń negizgi seriktesterimen yntymaqtastyqty odan ári damytý men keńeıtý jáne zııatkerlik menshik salasynda onyń bastamalaryn ilgeriletý máseleleri talqylandy.
Sonymen qatar Ádilet mınıstrligi men DZMU medıasııa jáne tórelik ortalyǵy arasynda ózara túsinistik týraly Memorandýmǵa qol qoıyldy. Bul qujat zııatkerlik menshik salasyndaǵy daýlardy sheshýdiń balamaly tásilderin damytýǵa yqpal etedi.
Aıta ketý kerk, sońǵy jyl ishinde ótkizilgen is-sharalar nátıjesinde Ádilet mınıstrligi «Ulttyq zııatkerlik menshik ınstıtýty» RMK men Eýrazııalyq patenttik vedomstvo arasynda elektrondyq qujat almasý týraly kelisimge qol qoıǵan edi.
Kelisimniń maqsaty – Eýrazııalyq ótinimderdi jiberýdiń elektrondyq formatyna tolyq kóshý. Bul óz kezeginde qoldanystaǵy Eýrazııalyq patentteý júıesi sheńberinde tirkeý rásimderin ońtaılandyrýǵa kómektesedi.
Dúnıejúzilik zııatkerlik menshik uıymy (DZMU) – Birikken Ulttar Uıymynyń zııatkerlik menshik salasyndaǵy mamandandyrylǵan mekemesi.