Búgingi tańda Jambyl ekonomıkasy qaryshty damyp keledi. Aǵymdaǵy jyldyń toǵyz aıynyń qorytyndysy boıynsha, oblys ekonomıkasynyń barlyq salalarynda oń nátıjelerge qol jetkizilgen. Bul týraly Jambyl oblysynyń ákimi Asqar Myrzahmetov qatysqan jıynda aıtylyp, óńir ekonomıkasyn budan ári damytýdyń jaıy talqylandy.
Jıynnyń kún tártibinde birqatar máseleler qaraldy. Áýeli oblys turǵyndarynyń turmystyq tabysyn jaqsartý jobasynyń óńir boıynsha atqarylý barysy saralandy. Jambyl oblystyq aýyl sharýashylyq basqarmasynyń basshysy Berik Nyǵmashevtiń málimdeýinshe, joba aıasyndaǵy pılottyq on aýyldyq okrýgter boıynsha bekitilgen jumys algorıtmi josparǵa saı oryndalýda. Basqarma basshysy jobaǵa qatysýshylardyń ótinimderin qabyldaýdyń kúndelikti jospary belgilengenin aıtyp, atalǵan baǵytta qarqyndy jumystar júrgizilip jatqanyn jetkizdi. Búginde turǵyndardan «Taraz» áleýmettik kásipkerlik korporasııasyna 1020 qujat ótkizilip, onyń 947-si qabyldanǵan. Al, 73 qujat qaıta qaralýǵa jiberilgen. Sondaı-aq, oblysta satyp alynatyn mal basynyń, tuqym men tyńaıtqyshtyń, jem-shóptiń josparly kórsetkishi men qurylǵan kooperatıvterdiń qajetti tehnıkamen qamtylý júıesi de oıdaǵydaı oryndalýda. О́z sózinde Asqar Myrzahmetov Úkimette bekitilgen tıisti qarajattyń keler aıdyń basynda túsetinin aıta kelip, qujat qabyldaý sharalary birinshi qarashaǵa deıin tolyǵymen aıaqtalý kerektigin eskertti. Ol boıynsha jospardan keshikken birqatar aýdandardyń jumystary synǵa alynyp, aýdan ákimderine naqty tapsyrmalar júkteldi. Ákim qurylǵan kooperatıvterdiń tehnıka bazalarynyń ornalasý aımaǵyna kóńil bólip, aldaǵy ýaqytta aýyldyq okrýgter mańynan shaǵyn qaıta óńdeý zaýyttaryn salýdyń mańyzdylyǵyna da nazar aýdardy. Ol boıynsha josparly jumystardy búginnen bastap júıeleı berý kerektigin basa aıtty.
Basqosýdaǵy ekinshi másele boıynsha Jambyl oblystyq ekonomıka jáne bıýdjettik josparlaý basqarmasynyń basshysy Gúldana Jaýynbekova sóz alyp, aǵymdaǵy jyldyń qańtar-qyrkúıek aılarynda oblys ekonomıkasynyń barlyq salalarynda oń kórsetkishter oryn alyp otyrǵanyn jetkizdi. Atap aıtqanda, ekonomıkalyq ósim birinshi jartyjyldyq qorytyndysymen 3,3 paıyzdy qurasa, qysqa merzimdi ekonomıkalyq ındıkator 105,6 paıyz deńgeıinde qalyptasqan. Sol sekildi ónerkásip salasyndaǵy ósim 5,7 paıyzǵa, aýyl sharýashylyǵynyń jalpy óniminiń ósimi 5,0 paıyzǵa, negizgi kapıtalǵa salynǵan ınvestısııa kólemi 17,3 paıyzǵa, halyqtyń orta eseppen jan basyna shaqqandaǵy aqshalaı tabystary 12,2 paıyzǵa artqan. О́z kezeginde ákim toǵyz aıdyń qorytyndysy boıynsha oblystyń ekonomıkalyq damýy Úkimette oń baǵalanǵanyn aıtyp, jyl sońyna deıin osy joǵary dınamıkany saqtap turýǵa barynsha kúsh salý kerektigin eskertti.