8 naýryz – áıel-ananyń qadiri men qoǵamdaǵy rólin aıryqsha aıshyqtaıtyn mereke. Osyndaı mereıli kún qarsańynda el isine belsene aralasyp, qoǵamdyq jaýapkershilikti názik bolmysymen úılestire bilgen tulǵalar eske túsedi. Solardyń biri – Lázzat Taımyrqyzy Qojahmetova. Onyń ómir joly bir ǵana salamen shektelmeıdi. Jýrnalıstıka, ustazdyq, qoǵamdyq qyzmet, memlekettik basqarý, depýtattyq mindet, ulttyq deńgeıdegi keńester men komıssııalar – munyń bári onyń taǵdyrynda toǵysqan. Lázzat Taımyrqyzynyń eńbek jolyna úńilgende eń aldymen ana júregin, azamattyq ustanymyn jáne qoǵam aldyndaǵy jaýapkershiligin ańǵarasyz. Onyń ónegeli ómiri – qazirgi qazaq áıeliniń jańa beınesin aıqyndaıtyn taǵylymdy úlgi.
Lázzat Qojahmetova 1976 jyly Qaraǵandy oblysynyń Aqtoǵaı aýdanyndaǵy aýylda dúnıege keldi. 1993-1997 jyldary E. Bóketov atyndaǵy Qaraǵandy memlekettik ýnıversıtetiniń jýrnalıstıka fakýltetinde bilim aldy.
Ǵylym men bilimge degen izdenisi munymen toqtaǵan joq. 2012 jyly osy ýnıversıtette magıstratýrany támamdap, 2018 jyly L. Gýmılev atyndaǵy Eýrazııa ulttyq ýnıversıtetinde doktorantýrany aıaqtady. Budan bólek, jýrnalısterge arnalǵan respýblıkalyq jáne halyqaralyq júzdegen kýrstar men semınarlarǵa, trenıngter men baǵdarlamalarǵa qatysyp, kásibı biliktiligin únemi jetildirip otyrdy.
1997 jyldan bastap 2025 jylǵa deıin E. Bóketov atyndaǵy Qaraǵandy ýnıversıtetiniń jýrnalıstıka kafedrasynda aǵa oqytýshy bolyp qyzmet atqaryp, júzdegen jas jýrnalıstke bilim berdi.
Ǵalym áıelder akademık Náılá Bazanova atyndaǵy qurmet belgisimen marapattaldy
Ustazdyq qyzmetpen qatar kásibı jýrnalıstıkadan qol úzgen joq. Ár jyldary «Qaraghandy Habary» gazetiniń bas redaktory, respýblıkalyq «Aıqyn», «Nehabar» gazetteriniń, bnews.kz/kz, abctv.kz, munara.kz aqparattyq portaldarynyń Qaraǵandy oblysyndaǵy menshikti tilshisi boldy.
Sonymen qatar Qaraǵandy oblysynyń IID Memlekettik til jáne aqparat basqarmasynda oqytýshy, Qaraǵandy qalalyq IIB baspasóz qyzmetinde ınspektor, «ART-TV» jáne «5 kanal» telekompanııalarynda tilshi qyzmetterin atqardy.
Osy jyldar ishinde ol jýrnalıstıkanyń shynaıy mektebinen ótip, qoǵamdaǵy ótkir máselelerdi batyl kóteretin kásibı maman retinde qalyptasty.
Analar amanatyLázzat Qojahmetovanyń qoǵamdyq belsendiligi onyń jeke ómirimen tyǵyz baılanysty. Ol – kópbalaly ana. Úshinshi perzentin 40 jasynda, tórtinshisin 41 jasynda dúnıege ákelgen.
2019 jyldyń qańtarynda Astanada 5 balanyń órtten qaza bolýy búkil eldi dúr silkindirdi. Osy qaıǵyly oqıǵadan keıin Lázzat Qojahmetova Qaraǵandy qalasynda «Talbesik» kópbalaly analar odaǵy» qoǵamdyq uıymyn quryp, óńirdegi kópbalaly analardyń basyn qosty.
Jýrnalıstik tájirıbesin paıdalanyp, ol kópbalaly analarǵa memlekettik baǵdarlamalardy qarapaıym ári túsinikti tilde jetkizdi. Járdemaqy alý, baspana kezegine turý, áleýmettik qoldaý tetikteri týraly aqparat berip, kóptegen otbasynyń máselesin sheshýge kómektesti.
2020 jyldan bastap onyń bastamasymen «Talbesik» uıymy oblys ortalyǵy men aýdandarynda «Shańyraq» otbasy ortalyqtaryn ashty. Bul ortalyqtar tek kópbalaly analarǵa ǵana emes, ómirlik qıyn jaǵdaıǵa tap bolǵan barlyq otbasylarǵa kómek kórsetetin mańyzdy áleýmettik alańǵa aınaldy.
Aqmaral Álnazarova mereke qarsańynda medısına qyzmetkerlerin marapattady
Ortalyqtar arqyly kóptegen otbasy memlekettik baǵdarlamalarǵa qatysyp, baspanaly boldy. Áleýmettik jaǵdaıy tómen azamattarǵa járdemaqylar rásimdeýge kómek kórsetildi. Analarǵa kásipkerlik negizderi boıynsha tegin kýrstar men sheberlik sabaqtary uıymdastyrylyp, quqyqtyq jáne psıhologııalyq keńes berildi. Lázzat Qojahmetovanyń muryndyq bolýymen kópbalaly jáne múmkindigi shekteýli balasy bar otbasylar qaıyrymdylyq negizde baspanaly boldy.
Lázzat Taımyrqyzy Qaraǵandy qalasynda jáne Shet, Buqar jyraý, Qarqaraly aýdandarynda ashylǵan osy ortalyqtardyń jumysyn úılestirip, otbasy ınstıtýtyn nyǵaıtý isin júıeli jolǵa qoıdy. Sonymen qatar Qazaqstan halqy Assambleıasynyń Qaraǵandy oblysyndaǵy Analar keńesiniń tóraǵasy bolyp, óńirdegi belsendi analardy biriktirdi.
Oblystyq máslıhat depýtaty retinde de ol óńirdegi áleýmettik bastamalardyń bel ortasynda júrdi.
2023 jyly Lázzat Qojahmetova Qaraǵandy qalasyndaǵy «Otbasyn qoldaý ortalyǵy» memlekettik mekemesiniń basshysy bolyp taǵaıyndaldy.
Onyń bastamasymen turmystyq zorlyq-zombylyq belgileri bar azamattarǵa arnalǵan ýaqytsha turaq-jaı ashyldy. 111 baılanys ortalyǵy arqyly júgingen azamattarǵa 14 oryndyq qaýipsiz baspana usynylyp, kóptegen otbasyǵa naqty kómek kórsetildi.
Lázzat Taımyrqyzy úshin basty qundylyq − halyqtyń ıgiligi. Ol qaı salada eńbek etse de adaldyq pen jaýapkershilikti basty qaǵıda etip keledi.
Jan-tánimen qoǵamǵa qyzmet etip júrgen ol myńdaǵan ananyń senimine ıe bolyp, kóptegen otbasynyń tiregine aınaldy.
Ulttyq deńgeıdegi qoǵamdyq qyzmetÁriptesteriniń aıtýynsha, Lázzat Taımyrqyzy qoǵamdyq ómirde árdaıym belsendilik tanytyp, áleýmettik máselelerdi batyl kóteretin qaıratker.
Ol «Talbesik» kópbalaly analar odaǵy» qoǵamdyq birlestiginiń jetekshisi retinde Prezıdent janyndaǵy Ulttyq qoǵamdyq senim keńesiniń, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń, Ulttyq quryltaıdyń múshesi boldy.
Bul alańdarda ol analar men otbasylardyń máselesin kóterip, áleýmettik saıasatty jetildirýge qatysty naqty usynystar aıtty. Onyń kóptegen bastamalary memlekettik baǵdarlamalar men zańnamalyq ózgeristerdiń negizine aınaldy.
Eńbek – el qurmetiniń ólshemiLázzat Qojahmetovanyń qoǵamdyq qyzmeti men eńbegi joǵary baǵalanyp keledi. Ol Qaraǵandy oblysy ákiminiń «Altyn suńqar», Qaraǵandy qalasy ákiminiń «Zamandas» syılyqtarynyń laýreaty.
Sonymen qatar Qazaqstan Respýblıkasy Prezıdentiniń, «AMANAT» partııasy tóraǵasynyń, mınıstrler men ákimderdiń Qurmet gramotalary men Alǵys hattarymen marapattalǵan.
Ol «Halyq alǵysy», «Eren eńbegi úshin», «Táýelsizdikke 30 jyl», «Konstıtýsııaǵa 30 jyl», «Qazaqstan halqy Assambleıasyna 30 jyl» medaldarynyń jáne «Qurmet» ordeniniń ıegeri.
Qyzylorda qalasynda ótken Ulttyq quryltaı otyrysynda Memleket basshysy Lázzat Qojahmetovanyń keýdesine «Qurmet» ordenin taqty. Bul – el damýyna, azamattyq qoǵamnyń nyǵaıýyna jáne áleýmettik máselelerdi sheshýge qosqan úlesiniń joǵary baǵalanýy.
Osy rette Prezıdent Qasym-Jomart Toqaev jeti jyl qatarynan 8 naýryz merekesi qarsańynda Lázzat Qojahmetovaǵa quttyqtaý hat joldaǵanyn aıta ketken jón.
Qazirgi tańda Lázzat Qojahmetova Astana qalasynda eńbek etip jatyr. Ol Mádenıet jáne aqparat mınıstrligine qarasty Etnosaralyq qatynastardy damytý komıtetiniń «Qoǵamdyq kelisim» RMM Aqparattyq jumys jáne qoǵammen baılanys basqarmasynyń basshysy qyzmetin atqarady.
Bul qyzmette ol qoǵamdaǵy kelisim men birlikti nyǵaıtýǵa baǵyttalǵan aqparattyq saıasatty júzege asyryp keledi.
Ulttyń uıytqysy, urpaqtyń tiregiLázzat Qojahmetovanyń ómir joly – qoǵamǵa qyzmet etýdiń, azamattyq jaýapkershiliktiń jáne analyq meıirimniń jarqyn úlgisi.
Jýrnalıstıkada – shyndyqty aıtqan qalamger, bilim salasynda – jas býyndy tárbıelegen ustaz, qoǵamda – myńdaǵan ananyń janashyry, memlekettik qyzmette – halyq múddesin qorǵaǵan basshy.
Osyndaı tulǵalardyń ómir joly búgingi qoǵam úshin de, keleshek urpaq úshin de úlken ónege. Lázzat Taımyrqyzynyń eńbegi – bir ǵana adamnyń tabysy emes, tutas qoǵamnyń úmiti men senimin aqtaǵan eńbek.
Sondyqtan onyń ómir joly – qazaq áıeliniń qaısarlyǵy men parasatynyń, meıirimi men jaýapkershiliginiń aıqyn kórinisi.