Oral qalasynda polıseıler kólik urlaýdyń erekshe oqıǵasyn áshkereledi, dep habarlaıdy Egemen.kz
Tergeý málimetinshe, jergilikti turǵyn kópqabatty turǵyn úıdiń aýlasynan ótip bara jatyp, turaqta turǵan avtokólikke nazar aýdarǵan. Ury kóliktiń qulyptalmaǵanyn ańǵarǵan. Birden salondaǵy zattardy emes, tutas kólikti alyp ketýdi oılaǵan.
Alaıda kóliktiń otaldyrý kilti ornynda bolmaǵan. Soǵan qaramastan kúdikti josparyn júzege asyrýdan bas tartpaı, evakýator shaqyryp, kólikti arqannyń kómegimen platformaǵa tıep, ózi aıtqan mekenjaıǵa jetkizgen.
Biraz ýaqyttan keıin kólikti Oral qalasynyń mańynan patrýldik polısııa batalonynyń qyzmetkerleri tapty. Memlekettik tirkeý nómirlerin tekserý barysynda avtokóliktiń izdeýde júrgeni anyqtalǵan.
Polısııa departamentiniń málimetinshe, urlyq sáti beınebaqylaý kameralaryna túsip qalǵan. Beınejazbalardyń kómegimen tártip saqshylary kólikti alyp ketken evakýatordyń derekterin anyqtap, kúdiktige shyqqan.
Jaýap alý kezinde er adam bóten kólikti tek minip júrý maqsatynda alǵanyn aıtqan.
Atalǵan derek boıynsha sotqa deıingi tergeý bastaldy. Polıseılerdiń aıtýynsha, avtokólik ózdigimen júrgizilmeı, evakýatormen tasymaldanǵandyqtan, is kólik aıdap ketý emes, múlik urlyǵy baby boıynsha qarastyrylyp jatyr.
Qazirgi ýaqytta kúdikti eshqaıda ketpeý týraly qolhatpen bosatylǵan.