Aqtaýda qoǵamdyq qaýipsizdikti qamtamasyz etýge baǵyttalǵan jańa tehnologııa engizilmek. Endi qaladaǵy qoǵamdyq oryndardy robot-ıtter patrýldep, quqyq buzýshylyqtardyń aldyn alýǵa kómektesedi, dep habarlaıdy Egemen.kz
Aqtaý qalasynda qoǵamdyq oryndardy patrýldeý úshin robot-ıtter paıdalanylatyn bolady. Bul týraly Qazaqstan Respýblıkasy Ishki ister mınıstrliginiń baspasóz qyzmeti habarlady.
Zamanaýı beınebaqylaý júıelerimen jabdyqtalǵan robottandyrylǵan keshender qoǵamdyq tártipti baqylap, jaǵdaıdy onlaın rejımde monıtorıngten ótkizedi jáne quqyq buzýshylyqtardyń aldyn alý jumystaryna qatysady. Jınalǵan aqparat naqty ýaqyt rejıminde jedel basqarý ortalyǵyna jiberilip otyrady.
Robot-ıtter kúmándi zattardy anyqtaýǵa, sondaı-aq tútin men órt belgilerin tirkeýge qabiletti. Qaýipti jaǵdaı anyqtalǵan kezde júıe tótenshe jaǵdaılar qyzmetterine avtomatty túrde habarlama joldaıdy.
Bolashaqta bul tehnologııany arnaıy jáne terrorızmge qarsy operasııalar kezinde paıdalaný múmkindigi qarastyrylýda. Jańǵyrtýdan keıin robottar qaýipti nysandardy qashyqtan tekserip, kúmándi zattardy tasymaldaý fýnksııasyn da atqara alady.
Aıta keteıik, mundaı robottandyrylǵan platformalar buǵan deıin Astana jáne Almaty qalalarynda engizilgen bolatyn.