AQSh prezıdenti Donald Tramp Iranmen aradaǵy kelissózder barysynda Tegerannyń ıadrolyq qarýdy tek ázirlemeýge ǵana emes, ony qandaı da bir jolmen satyp almaýǵa da kelisim bergenin málimdedi, dep habarlaıdy Egemen.kz.
Fox News arnasyna bergen suhbatynda Tramp bastapqyda Irannyń ıadrolyq qarý jasamaýǵa ǵana ýáde bergenin, alaıda keıin bul talaptyń keńeıtilgenin aıtty.
– Alǵashynda olar «biz ıadrolyq qarý jasamaımyz» dedi. Men «al eger ony satyp alsańyzdar she?» dep suradym. Sondyqtan kelisimde endi Irannyń ıadrolyq qarýdy ázirlemeıtini de, satyp almaıtyny da kórsetilgen. Bul úlken aıyrmashylyq, – dedi AQSh prezıdenti.
Tramptyń aıtýynsha, Vashıngton men Tegeran tıimdi kelisimge qol jetkizýge jaqyn. Alaıda kelissózder nátıje bermese, AQSh áskerı áreketterge qaıta oralýy múmkin ekenin eskertti.
– Biz óte jaqsy kelisimge jaqyndap qaldyq. Eger oǵan qol jetkizsek, bul tamasha bolady. Al eger mámile jasalmasa, áskerı vedomstvonyń múmkindikterin qaıta paıdalanamyz, – dedi Aq úı basshysy.
Sonymen qatar, Tramp Iran tarabynyń kelissóz júrgizýde óte qatań ustanymda ekenin atap ótti. Onyń sózinshe, taraptar óz maqsattaryna birtindep jaqyndap keledi.
Eske salaıyq, AQSh pen Izraıl bıyl aqpan aıynyń sońynda Iran aýmaǵyndaǵy nysandarǵa soqqy jasaı bastaǵan bolatyn. Keıin taraptar sáýir aıynda atysty toqtatý týraly málimdegenimen, kelissózder aıtarlyqtaı nátıje bergen joq. Soǵan qaramastan, áskerı qaqtyǵystardyń qaıta jandanǵany týraly resmı aqparat jarııalanǵan joq.