«Qashaǵan» ken ornyn ıgerip jatqan NCOC konsorsıýmy maýsym aıyna josparlanǵan kúrdeli jóndeý jumystaryn keıinge qaldyrdy, dep habarlaıdy Egemen.kz.
Basylym málimetinshe, teńizdegi jáne qurlyqtaǵy óndiristik nysandarda 1 maýsymnan bastalýy tıis bolǵan 35 kúndik josparly jóndeý jumystary keıinge shegerilgen.
Osynyń arqasynda Qashaǵandaǵy munaı óndirý kólemi maýsym men shildeniń basynda táýligine shamamen 400 myń barrel deńgeıinde saqtalady.
Mundaı sheshim qabyldaýǵa Teńiz ken ornyndaǵy óndiris kóleminiń ýaqytsha tómendeýi sebep bolǵany aıtylýda. Sarapshylardyń pikirinshe, elimizdegi eki iri munaı jobasynyń bir mezgilde toqtaýy Qazaqstan munaıynyń eksport kólemine eleýli áser etýi múmkin edi.
Sonymen qatar, NCOC jóndeý jumystaryna daıyndyqty bastap ketken merdiger kompanııalardyń shyǵyndaryn da baǵalap jatyr.
Eske salaıyq, Energetıka mınıstri jyl sońyna deıin Qashaǵandaǵy jańa zaýyttyń qurylysy aıaqtalatynyn aıtqan bolatyn.
Buǵan deıin munaı alpaýyttary Qashaǵandaǵy ekologııalyq talaptardy buzyp kelgenin jazǵan bolatynbyz.