...Qala shetine kelip, sen mynaý soqyr tumannan seskenip, endi ne isterińdi bilmeı, irkilip qaldyń. Aldyńa qarap alańdap, aıaǵyńdy bir basyp, eki basyp, adymdap kórip ediń, arasynda kim bar ekeni, ne bar ekeni belgisiz sup-sur dúnıe óziniń sup-sýyq qushaǵyna tartyp alyp, áp-sátte jutyp qoıardaı tula boıyń qaltyrap-dirildep ketti.
Sebebi sen ósken aýyldyń aspany ashyq, bulttary appaq, aýasy tap-taza edi ǵoı. Altyn tabaq sekildi kúni kúlimdep, shýaq shashyp turatyn. Irgeden uzap shyǵa bere-aq dóń asyp, dala kezip ketetin qasqa joldar alysqa-a, alańsyz qyzyq saparlarǵa shaqyryp jatýshy edi. Aınala-tóńirekten tanaýyńdy qytyqtap, boz jýsannyń hosh ıisi burqyraıtyn...
Bilem. Bárin de bilem. Sebebi men de sol aýylda týyp-óstim ǵoı. Toqta... Toqta, mynaý soqyr tumannyń arasynan sharq uryp meni izdemek bolyp tursyń-aý, jazǵan. Jo-joq. Alǵa qaraı bir adym da attap basýshy bolma. Adasyp ketesiń. Onda ekeýmiz bir-birimizden máńgilikke kóz jazyp qalamyz.
Maǵan seniń sol jerde, ashyq aspannyń astynda aıaldaı turǵanyń qymbat. Búgin bolmasa, erteń... ıá, ıá, erteń qalyń tumannyń arasynan shyǵa kelip: «Amansyń ba...» dep, qushaǵymdy jaıamyn. Sodan soń ekeýmiz aýylǵa...
Oý, nege?! Nege basyńdy shaıqaısyń? Álde mynaý qalyń tumandy qaq jaryp shyǵa keletinime senbeısiń be?.. E-eh!.. Khe, khe, khe!..
Aýrýhana tóseginde jatqan ap-aryq, kip-kishkentaı kisi býlyǵa jótelip, aýa jetpeı tunshyǵa bastady. Kórshi kereýettegi eńgezerdeı orys shal basyn kóterip, esik jaqqa qarap: «Sestra, sestra!» dep daýystady.
Dálizde otyrǵan medbıke júgire basyp, tez-aq jetip keldi.
– On bredıt, – dedi shal. – Tıajelo emý.
Medbıke naýqastyń jastyǵyn túzep, qolyndaǵy aq dákemen kóbirshiktene bastaǵan ezýin súrtti. Ol taǵy da kúbirlep, sóıleı bastady.
...Meniń mynaý soqyr tumannyń ishinde júrgenime, bıyl mine, qyryq jyl boldy. Nege... Nege deısiń be?.. Oqydym... Bilim aldym... Kandıdattyq qorǵadym. Doktor boldym. Ǵylym izdedim... Áı, biraq... Taptym ba, joq pa?.. Bilmeımin...
Medbıke naýqastyń qup-qý reńine tesile qarap turyp:
– Iá, – dedi kórshi kereýettegi shaldyń sózimen keliskendeı basyn shulǵyp. – Sandyraqtap jatyr.
– O chem on govorıt?
– Bul kisi ǵalym adam ǵoı. Sol baıaǵy... ǵylym-bilim týraly aıtady da...
– A-a... S nımı takoe byvaet.
Medbıke qan-sól joq júzinde kókshil daqtar paıda bola bastaǵan naýqastyń shıdeı bileginen ustap, qan tamyrynyń soǵysyn ólsheı bastaǵanda ol taǵy da sandyraqtady.
...Keldiń be? Soqyr tumannyń arasynan qalaı taptyń meni?.. Qolyń qandaı jumsa-a-aq. Týh!.. Raqatyn-aı!.. Quddy... quddy ózimizdiń aýyldyń borpyldaǵan yp-ystyq maı topyraǵy sekildi...
Sony aıtty da, naýqastyń demi úzilip ketti. О́z ómiriniń eń sońǵy sátinde onyń kóz aldyna sol baıaǵy mektepte birge oqyǵan qaratory óńdi, áp-ádemi taldyrmash qyz elestegenin, bala kezdegi alańsyz, adal dostyqty, aq mahabbatty ańsaǵanyn eshkim de bilgen joq.