Nur-Sultanda 23 qyrkúıek pen 23 qazan aralyǵynda ótken «STOP týberkýlez» atty aılyq aksııasy qorytyndylandy. Bul týraly Nur-Sultan qalasy ákimdiginiń baspasóz qyzmeti habarlady.
Ákimdiktiń bastamasymen qalalyq Qoǵamdyq densaýlyq saqtaý basqarmasynyń uıymdastyrýymen ótti. Aksııa músheleri qaladaǵy halyq kóp jınalatyn oryndardy aralap, tekserý jumystaryn ótkizdi. Onyń ishinde qaladaǵy saýda ortalyqtary, bazarlar jáne turǵyn úı alaptaryn aralady. Degenmen basymdyq qala shetindegi eldi mekenderge berildi.
«Sondaı-aq qaladaǵy emhanalarda ashyq esik kúni uıymdastyrylyp, turǵyndar arasynda túsindirý jumystary ótkizildi. Odan bólek, JOO da qamtyldy, ıaǵnı 4 astanalyq oqý ornynda flıýorografııalyq tekserý jumysy uıymdastyryldy», - dedi Nur-Sultan qalasy Qoǵamdyq densaýlyq saqtaý basqarma basshysynyń orynbasary Álııa Rústemova ákimdikte ótken baspasóz máslıhatynda.
Onyń aıtýynsha, týberkýlez aýrýyna qarsy uıymdastyrylǵan aksııa 14 myń adamdy qamtydy. «Aksııa nátıjesinde 75 adamnan týberkýlez aýrýynyń oń belgisi bar bolyp tabyldy. Arnaıy tekserýlerden keıin 9 adamnan týberkýlez aýrýynyń alǵashqy belgisi anyqtaldy. Bul baǵyttaǵy jumystar óz jalǵasyn tabady. Aldaǵy ýaqytta jumys kúnderi tekserile almaıtyn azamattar úshin demalys kúnderi tekserý jáne anyqtaý sharalary uıymdastyrylatyn bolady», - dedi ol.
Qalalyq ftızıopýlmonologııalyq ortalyǵynyń málimetine súıensek, elordada sońǵy 5 jylda atalǵan aýrýǵa ushyraǵandar sany 1,5 esege qysqarǵan.