Pernebaı Dúısenbın oqyrman qaýymǵa balalar jazýshysy retinde belgili. Ol ár jyldary uıymdastyrylǵan respýblıkalyq jabyq báıgelerdiń birneshe ret jeńimpazy atandy. Qalamgerdiń qalamynan aýyl balalarynyń ómirin qamtyǵan birneshe povest, áńgime, óleń, ertegiler týǵan. Sonymen qatar jazýshy shyǵarmashylyǵynan Japonııanyń Nagasakı qalasyna tastalǵan atom bombasynyń zardaptary, halyqtar dostyǵy sekildi máseleler de tys qalmaǵan.
Jas oqyrmandar úshin Pernebaı Dúısenbın shyǵarmalarynan alatyn shynaıy dúnıe kóp. Osy oraıda Jambyl oblystyq mektep olımpıadalaryn jáne mektepten tys is-sharalardy ótkizý ortalyǵynda D.Qonaev atyndaǵy oblystyq balalar men jasóspirimder kitaphanasynyń uıymdastyrýymen jazýshy shyǵarmashylyǵynan baıqaý óz máresine jetti. Baıqaýdyń alǵashqy kezeńine qalalyq, aýdandyq jáne aýyldyq balalar kitaphanalarynyń 7-10 jáne 10-15 jas aralyǵyndaǵy oqyrmandary qatysyp, ózara baq synasqan bolatyn. Oǵan jas erekshelikterine qaraı eki topta 18 úmitker qatysqan.
Baıqaýdy Jambyl oblystyq mádenıet, arhıvter jáne qujattama basqarmasy basshysynyń orynbasary Lesbek Amalov quttyqtaý sóz sóılep ashyp, úmitkerlerge sáttilik tiledi. О́z kezeginde jasóspirim kitapqumarlar «Men kitaphananyń turaqty oqyrmanymyn» – ózin-ózi tanystyrý, «Pernebaı Dúısenbın – balalar ádebıetiniń kórnekti ókili» – avtordyń balalar ómiri týraly shyǵarmalarynan úzindilerdi jatqa aıtý, teatrlandyrylǵan kórinis qoıý, «Portret galereıasy» – somsýrette beınelengen kisiniń kim ekenin tabý, «Ádebı báıge» – jazýshy ómiri men shyǵarmashylyǵyna qatysty suraqtarǵa jaýap berý kezeńderinde bar bilgenin ortaǵa saldy. Sondaı-aq jas oqyrmandar avtordyń «Jumbaq juldyz», «Kishkentaı generaldar», «Án salyńyzshy, áke», «Sol bir ertegi...», «Qaısar Qaryndash týraly hıkaıa», «Esen-saý júrińizshi, áke», «Biz, Tólepbek ataı, samolet komandıri jáne Palma», «Oıynpaz oıynshyqtar otaýynda nemese Dáýrenniń oıynshyqtary» povesteri men «Aı aıtqan syr», «Kólbaqa oqıǵasy», «О́tpeli mashına», «Dostasý» sekildi birqatar áńgimelerin jáne aq óleń túrinde jazylǵan «Alpamys» dramasynyń úzindilerin jatqa aıtyp, jazýshy shyǵarmashylyǵymen jan-jaqty tanys ekendikterin kórsetti.
Qazylar alqasy balalardy shyǵarmany tańdaý talǵamyna, daýys mánerine, til tazalyǵyna, jan-jaqtylyǵyna jáne de sahnada ózin ózi ustaý mádenıetine aıryqsha nazar aýdardy. Is-shara sońynan qazylar alqasynyń tóraǵasy, jazýshy-dramatýrg Elen Álimjan jınalǵandardy baıqaý qorytyndysymen tanystyryp, balalardyń talabyna tilektestigin jetkizdi. Jeńimpaz jáne júldeger atanǵan oqyrmandar dıplomdarmen, al ózge qatysýshylar Alǵys hattarymen marapattaldy. Jazýshy Pernebaı Dúısenbın jas oqyrmandarynyń barlyǵyna da óziniń tilegi jazylyp, qoltańbasy qoıylǵan kitaptaryn syılady.
Jambyl oblysy